Holanda do t’i japë Ukrainës qindra raketa kundërajrore “Stinger”
Qeveria holandeze, në një letër dërguar Kuvendit, tha se Holanda do t’i japë Ukrainës 200 raketa kundërajrore sa më shpejt që është e mundshme.
Në letër gjithashtu thuhet se stafi i ambasadës holandeze do të zhvendoset nga qyteti Lviv në Jaroslaw, matanë kufirit, në Poloni, për shkak të përkeqësimit të situatës së sigurisë, shkruan Reuters, përcjell Gazeta Express.
“Bashkë me aleatët tanë, Ministria e Mbrojtjes synon që këto materiale të dërgohen sa më shpejt që është e mundshme”, shtohet në letrën zyrtare.
Më herët këtë muaj, Holanda i ka premtuar Ukrainës edhe pajisje të tjera si ndihmë, përfshirë pushkët, municionin, sistemet e radarëve dhe robotët për zbulimin e minave.
