Kompanitë kineze përbënin 46 për qind të kapacitetit global të inovacionit vitin e kaluar, zbuloi Qendra për Menaxhimin e Automobilave (CAM) në një raport të publikuar të enjten. Një vit më parë, pjesa e tyre ishte vetëm 21 për qind, tregoi raporti i Qendrës. Pjesa e kompanive gjermane ra nga 45 në 23 për qind.

Pesë kompani kineze në top 10

Për herë të parë vitin e kaluar, konkurrenca nga Kina kapërceu tre prodhuesit kryesorë gjermanë në renditje. Rreth pesë kompani kineze hynë në top 10 prodhuesit më inovativë të automjeteve, treguan të dhënat.

“BMW” gjermane ka konfirmuar pozicionin e saj drejtues në renditje falë risive të shumta në fushën e drejtimit automatik, distancës mes karikimit të automjeteve elektrike dhe vetë teknologjisë së karikimit.

Kinezët “Geely” dhe “SAIC” pasojnë me rezultate të mira në fushën e elektromobilitetit, sistemeve të asistencës së shoferit dhe kontrolleve dhe ekraneve. Industria po përjeton një “ndryshim tektonik në ekuilibrin e fuqisë në favor të kompanive kineze të makinave”, përfundon themeluesi dhe udhëheqësi i kërkimit CAM Stefan Bratzel.

“CAM” ka përpiluar raporte që nga viti 2005. Ekspertët e saj vlerësojnë, ndër të tjera, shkallën e inovacionit të kompanive, avantazhet për klientët dhe origjinalitetin. Hulumtimi aktual mbulon më shumë se 700 risi nga 30 grupe me më shumë se 100 marka makinash.