Janë emëruar qytetet më tërheqëse në botë: A keni vizituar ndonjë prej tyre?

Po planifikoni një udhëtim këtë dimër, por nuk mund të vendosni se ku? Ju prezantojmë një përmbledhje të qyteteve më tërheqëse në botë sipas “Global Power City Index” për vitin 2023. Kjo listë rendit qytetet sipas aftësisë së tyre për të tërhequr njerëz, kapital dhe kompani nga e gjithë bota, duke analizuar një sërë faktorësh si forca ekonomike, cilësia e jetës, ofertat kulturore dhe ndikimi global.

Londra – në krye të listës është kryeqyteti britanik me gjithsej 1647 pikë, gjë që konfirmon pozicionin e saj si një nga qendrat më me ndikim në botë për ekonomi, kulturë dhe inovacion.

Nju Jork – epiqendra globale e financave dhe kulturës, me 1506 pikë. Qyteti vazhdon të tërheqë kompani, turistë dhe talente nga e gjithë bota.

Tokio – Kryeqyteti japonez është në vendin e tretë me 1376 pikë, duke u shquar për përparimin teknologjik dhe stilin modern të jetesës.

Paris – Qyteti i Dritës është në vendin e katërt me 1364 pikë, i njohur për trashëgiminë e pasur kulturore dhe historike, por edhe si qendra e biznesit të Evropës.

Singapori – Ky qytet-shtet aziatik u rendit i pesti me 1265 pikë, falë ekonomisë së fortë, standardit të lartë të jetesës dhe ndikimit global.

Amsterdam – me gjithsej 1246 pikë, kryeqyteti holandez renditet i gjashti, i njohur për inovacionin, cilësinë e jetës dhe mjedisin miqësor të biznesit.

Seul – kryeqyteti i Koresë së Jugut është në vendin e shtatë me 1202 pikë falë zhvillimit teknologjik dhe ndikimit në rritje globale.

Dubai – Kjo qendër e pasur biznesi në Lindjen e Mesme është në vendin e tetë me 1163 pikë, duke kombinuar infrastrukturën moderne dhe atraktivitetin për investitorët.

Melburni – qyteti australian është në vendin e nëntë me 1155 pikë, i njohur për dizajnin e tij urban dhe cilësinë e lartë të jetës.

Berlini – në vendin e dhjetë me 1152 pikë është kryeqyteti gjerman, i cili shquhet për sektorin e tij krijues dhe rëndësinë historike.