Jansha vazhdon qeverisjen në Slloveni

Qeveria e kryeministrit slloven Janez Jansha fitoi besimin në parlament sonte dhe propozimi i opozitës për të caktuar Karel Erjavec mandatar për formimin e qeverisë së re nuk kaloi.

Opozita sllovene, e bashkuar në Koalicionin e Harkut Kushtetues (KUL), kërkoi një votë mosbesimi për qeverinë Jansha dhe caktoi Erjavec si kryeministrin e saj të ri.

Pas një debati parlamentar një ditor në të cilin opozita e majtë-liberale akuzoi qeverinë Jansha për mosrespektim të parimeve kushtetuese, stilin autoritar të qeverisjes, gabimet në politikën e jashtme, distancën nga shtetet qendrore të Bashkimit Evropian dhe menaxhimin e dobët të epidemisë, u mbajt votimi i fshehtë.

Vetëm 53 nga 90 vetë votuan në Asamblenë Kombëtare. Shumica e anëtarëve të koalicionit të Jansha, si dhe përfaqësuesit e Partisë Demokratike Sllovene (SDS), Zmaga Jelinçiq, në mënyrë demonstrative nuk votuan, duke shprehur kështu mbështetjen e padiskutueshme për qeverinë.

Siç tha kryetari i parlamentit Igor Zorçiq pas votimit, 47 nga 53 fletëvotimet e paraqitura ishin të vlefshme, nga të cilat 40 votuan për emërimin e Erjavec si kryeministër, ndërsa shtatë votuan kundër dhe gjashtë fletëvotime ishin të pavlefshme.

“Kjo do të thotë që Erjavec nuk mori shumicën e nevojshme të anëtarëve të parlamentit për t’u zgjedhur kryeministër i qeverisë së re dhe se nuk u dha asnjë votë mosbesimi në qeverinë Janez Jansha”, tha Zorçiq.

Përfaqësuesit e pesë partive të opozitës paraqitën një “mosbesim konstruktiv” ndaj qeverisë: Lista e Marjan Sharec (LMSH), Social Demokratët (SD), e Majta, Partia Demokratike e Pensionistëve (DESUS) dhe Partia Alenka Bratushek (SAB)