Juventusi i shokuar, FIGC kërkon dënim me 9 pikë!
Kërkesa e prokurorisë së FIGC-së në Gjykatën Federale të Apelit ndaj klubit të Juventusit është shumë e rëndë: në fakt kërkohet dënimi me 9 pikë penalizim në kampionatin aktual.
Vetëm mirë për klubet e tjera të përfshira. Topi tani do t’i kalojë mbrojtjes, me gjykatën e cila më pas do të vendosë nëse do të pranojë revokimin dhe rrjedhimisht rihapjen e procesit sportiv, apo ta mbyllë këtë kapitull njëherë e mirë.
Nga njëra anë, prokuroria federale e drejtuar nga prokurori Chiné, nga ana tjetër Juve dhe klubet e tjera të përfshira, përkatësisht Sampdoria, Pro Vercelli, Genoa, Parma, Pisa, Empoli, Novara dhe Pescara. Kjo është loja që luhet para Gjykatës Federale. Kërkesa e Prokurorisë së FIGC-së bazohet në elementet e reja të akuzës që kanë dalë nga hetimi i shumëpërfolur “Prisma”.
Për sa i përket klubit të Juventusit, në lupë janë bilancet me fitimet kapitale dhe në veçanti marrëveshjet private të lidhura me të ashtuquajturën “manovër pagash”, me kartonin e famshëm të Ronaldos. Shkeljet e mundshme janë ato të komunikimeve të rreme të korporatës dhe “lëshimi i faturave për operacione që nuk ekzistojnë”.
Mbi bazën e gjithë kësaj (përgjime, dokumente, emaile dhe më shumë) prokurori i FIGC-së ka lëvizur për rihapjen e procesit, pas atij të pranverës së kaluar, që përfundoi me lirinë e të gjitha klubeve të përfshira. Pikërisht për këtë, prokurori Giuseppe Chiné në aktakuzën e tij kërkoi sanksione më të rënda se ato të gjykimit të fundit, që parashikonte gjoba dhe pezullime.
Numri një i prokurorisë së FIGC kërkoi heqjen e 9 pikëve nga renditja për Juventusin, 16 muaj pezullim për Agnelli, 20 muaj e 10 ditë për Paraticin, 10 muaj për Cherubini dhe 12 muaj për të gjithë drejtorët e tjerë të Juventusit. Në thelb një dënim për pothuajse të gjithë ish-bordin e drejtorëve të “Zonjës së Vjetër”.
