Kevin Bacon: Kam provuar t’i mbroj fëmijët e mi nga fama

Aktori Kevin Bacon ka folur për arsyen se pse e ka shmangur marrjen e fëmijëve të tij në premiera filmash.

66-vjeçari, i cili ka një djalë, Travis (35 vjeç), dhe një vajzë, Sosie (33 vjeçe), nga martesa e tij me aktoren Kyra Sedgwick, ka thënë se ka bërë gjithmonë përpjekje për t’i mbrojtur ata nga presioni i famës.

“Kur u bë fjalë për t’i marrë fëmijët me vete nëpër premiera të filmave, t’i bëja t’i shikonin filmat ku luaja, e të ju tregoja ndonjë artikull që është shkruar në gazetë për mua… nuk e kemi bërë asnjëherë këtë, e kemi shmangur me çdo kusht”, ka thënë aktori në një intervistë të re për Mythical Kitchen’s Last Meals, të publikuar nga PEOPLE.

Ai ka thënë se ndonjëherë vëmendja e madhe mund të duket e mirë, por në të njëjtën kohë edhe e çuditshme.

“Kur e kupton që gjithmonë ekziston mundësia të dalësh nga shtëpia dhe dikush të të njohë, të të shikojë ose të ketë një opinion për ty vetëm për shkak të një pune që ke bërë, fillon të mendosh: ‘Në rregull, është fantastike. Kjo ishte gjithmonë ëndrra ime, por është një mënyrë e çuditshme për të jetuar. 99 për qind është diçka e mirë, por prapë është pak e çuditshme’”, ka shtuar Bacon.

Ylli e pranon se fëmijët e tij e kanë përjetuar famën pa dëshirën e tyre.

“Sa i përket famës, nuk kam kë të fajësoj përveç vetes. Ishte diçka që unë e kërkova me çdo kusht. Por për ta, ishte diçka që u erdhi papritur”, ka treguar Bacon.

Duke folur për mënyrën se si i ka rritur fëmijët e tij, aktori ka theksuar se do të duhej t’i linte më të lirë që të gjenin vet rrugën e tyre.

“Mendoja se duhej t’i lija të gjenin vet rrugën e tyre. Kështu i edukuam. Gjithmonë u them: ‘Duhet të ketë qenë e vështirë për ju. Ju lutem, më tregoni. Dua ta di. Bisedoni me terapistin tuaj, nuk ka problem’”, ka treguar tutje 66 vjeçi.

Por, sipas tij, fëmijët nuk duan t’i ndajnë shqetësimet e tyre me të.

Ai ka thënë gjithashtu se nuk i pëlqen kur në ndonjë dasmë dëgjon këngën e filmit “Footloose” dhe ka zbuluar se u kërkon DJ-ve që të mos luajnë këtë këngë.

Filmi i vitit 1984 e bëri atë një yll, por aktori nuk e pëlqen faktin që shpesh i kërkohet të rikrijojë skenat e tij ikonike nëpër ngjarje të ndryshme.

“Në fillim, gjithçka është për nusen. Pastaj, kur hyn alkooli në lojë, rreth orës 22:30, dikush vë këngën dhe papritmas dasma kthehet në një ngjarje ku të gjithë presin që unë të kërcej. Njerëzit formojnë një rreth rreth meje dhe duartrokasin sikur të jem një majmun i stërvitur”, pati thënë aktori në një intervistë.