Konjufca: Bashkëpunimi mes Kosovës dhe Maqedonisë së Veriut është i frytshëm dhe i ngushtë

Kryetari i Kuvendit të Republikës së Kosovës, Glauk Konjufca gjatë qëndrimit të tij në Shkup tha se Kosova me Republikën e Maqedonisë së Veriut ndan qëllime të përbashkëta strategjike dhe gjeopolitike, ai me këtë raste nënvizoi aderimin e të dyja vendeve në Bashkimin Evropian.

“E patëm një takim të ngrohtë dhe miqësor. Ky takim është reflektim i miqësisë së vërtet mes Republikës së Kosovës dhe Maqedonisë së Veriut. Marrëdhëniet e Kosovës me Maqedoninë e Veriut janë shembull për një fqinjësi të mirë. 13 vjet prej kur RMV-ja ka njohur shtetin tonë dhe prej atëherë në çdo fushë mes dy vendeve tona është thelluar vazhdimisht bashkëpunimi. Kjo miqësi mes dy shteteve tona nuk është vetëm formale dhe institucionale por ka të bëj me lidhshmërinë e popujve tanë nga dimensioni historik, kulturor dhe lidhje të shumta familjare. Bashkëpunimi ynë ekziston në mes të parlamenteve dhe qeverive tona. Këtë e dëshmoi mbledhja e përbashkët, ndërsa mbledhja e ardhshme do të mbahet në Kosovë. Bashkëpunimi është i frytshëm dhe i ngushtë”, deklaroi Glauk Konjufca, kryetar i Kuvendit të Kosovës.

Nga an tjetër kryetari i Kuvendit të Republikës së Maqedonisë së Veriut, Talat Xhaferi deklaroi se Maqedonia e Veriut mbështet plotësisht dialogun Kosovë-Serbi deri në zgjidhjen përfundimtare të pranuar nga të dyja palët, marrëveshje që ofron paqe dhe stabilitet në rajon.

“Mbështetje e plotë deri në arritjen e zgjidhjes përfundimtare. Republika e Maqedonisë së Veriut jep përkrahje të fuqishme për liberalizimin e vizave për qytetarët e Republikës së Kosovës dhe e përshëndesim vendimin e ambasadorëve të vendeve anëtare të BE-së për ti dhënë mandat Këshillit Evropian të negociojë në procesin e liberalizimit për Kosovën.”, tha Talat Xhaferi, kryetar i Kuvendit të RMV-së.

Konjufca gjatë qëndrimit në Shkup është pritur edhe nga presidenti i vendit, Stevo Pendarovski/ Alsat.mk