Komisionerja e BE-së për Zgjerim, Marta Kos, thotë se Maqedonia e Veriut duhet të bëjë ndryshime kushtetuese që do të përfshinin bullgarët në Kushtetutë, si kusht për vazhdimin e procesit të integrimit evropian.
Në një intervistë me BNT-në bullgare, kur u pyet se si mund të ndikonte te Shkupi që të bënte ndryshime kushtetuese, Kos tha se beson që me qeverinë e re bullgare do të gjendet një mënyrë që procesi me Maqedoninë e Veriut të vazhdojë.
“Kjo është një pyetje shumë e mirë dhe do të isha shumë i lumtur nëse do ta shfrytëzonim këtë moment zgjerimi edhe për Maqedoninë e Veriut. Unë besoj në qeverinë e re bullgare, me të cilën bashkëpunoj shumë mirë. Të gjithë së bashku do të gjejmë një mënyrë për ta çuar përpara procesin me Maqedoninë e Veriut. Sigurisht, qeveria në Maqedoninë e Veriut duhet ta mbajë premtimin e saj. Ata duhet ta ndryshojnë kushtetutën e tyre, kjo është rënë dakord midis Maqedonisë së Veriut dhe 27 vendeve anëtare të BE-së. Pasi të bëhet kjo, do të mbështetem edhe në mbështetjen e vendit tuaj, në mënyrë që të mund të ecim përpara edhe me Maqedoninë e Veriut.”
