Kryhet transplanti i parë i mushkërive te njeriu, me ndihmën e një roboti
Kryhet transplanti i parë i mushkërive te njeriu, me ndihmën e një roboti
Një spital në Spanjë ka përfunduar me sukses transplantin e parë në botë të mushkërive me ndihmën e robotëve.
Transplantet tipike të mushkërive janë mjaft invazive: duhet bërë një prerje 30 centimetra në gjoks dhe brinjë të shumta duhet të thyhen në mënyrë që kirurgët të mund të hyjnë në mushkëritë e pacientit, t’i heqin ato dhe t’i zëvendësojnë me mushkëri të shëndetshme nga dhuruesi.
Por falë robotit da Vinci, kirurgët ishin në gjendje të prenë një pjesë shumë më të vogël të gjoksit pa thyer asnjë brinjë. U bënë prerje të vogla në anë të brinjëve për të lejuar që krahët robotikë dhe një kamerë 3D të funksionojnë, duke u dhënë kirurgëve një pamje 360 gradë të mushkërive.
Roboti u zhvillua nga korporata amerikane Intuitive Cardiac në vitin 2000 dhe tani përdoret për të trajtuar mijëra pacientë çdo vit. Sistemi nuk e kryen vetë operacionin, por lejon kirurgun të drejtojë robotin me lëvizjet e duarve në një tastierë speciale, të cilën robotët e interpretojnë dhe e kryejnë në kohë reale.
Roboti është përdorur vetëm një herë për një transplant të mushkërive, në spitalin Cedars-Sinai në Los Angeles. Por me atë rast u përdor vetëm për një pjesë të procedurës, dhe më vonë mushkëritë u futën në gjoks në mënyrë tradicionale.
Aplikimi i ri i teknologjisë është më pak i dhimbshëm për pacientin dhe zvogëlon rrezikun e infektimit pas operacionit, pasi plaga mbyllet lehtësisht.
– Besojmë se është një teknikë që do të përmirësojë cilësinë e jetës së pacientëve, do të reduktojë periudhën pas operacionit dhe do të reduktojë dhimbjen – thotë doktor Albert Jauregui, shef i Departamentit të Kirurgjisë Torakale dhe Transplantimit të Mushkërive në Spitalin Universitar në “Val. d’Hebron”.
Për shkak të prerjes së vogël, pacienti mori paracetamol vetëm pas operacionit. Transplantet konvencionale të mushkërive në përgjithësi kërkojnë trajtim postoperativ me medikamente shumë më të forta kundër dhimbjes opioid.
– Ky operacion nuk do të qëndrojë vetëm këtu, prandaj po ia tregojmë botës. Nëse kjo teknikë funksionon, dhe ne besojmë se funksionon, atëherë duhet të zgjerohet sepse qëllimi më i rëndësishëm është të ndihmojmë sa më shumë njerëz – thotë doktor Jauregui.
