Ky është vendi më dëshpërues në Evropë

Një studim i ri mbi nivelin e depresionit në Evropë, i cili gjithashtu analizon dallimet midis brezave të rinj dhe të vjetër, tregon të dhëna shqetësuese për Francën.

Franca mund të ketë pasur shkallën më të lartë të depresionit në Evropë edhe para pandemisë, sipas një analize të re të një studimi shëndetësor të vitit 2019. Hulumtimi, i kryer nga departamenti i statistikave të Ministrisë së Shëndetësisë dhe Çështjeve Sociale të Francës, zbulon se shkalla e depresionit në Francë para pandemisë ishte rreth 11 për qind, më e larta në mesin e vendeve evropiane.

Kjo analizë bazohet në të dhënat nga Anketa Evropiane e Shëndetit, e cila kryhet çdo gjashtë vjet dhe përfshin rreth 300,000 të anketuar nga Bashkimi Evropian, Norvegjia, Islanda dhe Serbia.

Si vlerësohet depresioni?

Kjo është hera e parë që Ministria Franceze e Shëndetësisë dhe Çështjeve Sociale ka përdorur sondazhin e vitit 2019 për të matur depresionin, me të dhënat e bazuara në tetë pyetje nga një pyetësor standard mbi gjendjen shëndetësore të pacientëve. Hulumtimi u fokusua nëse një person kishte simptoma të depresionit në dy javët e fundit sipas kritereve të caktuara.

Rezultatet vijnë në një kohë kur studime të shumta tregojnë për një krizë në rritje të shëndetit mendor për shkak të pandemisë, veçanërisht midis të rinjve në Francë dhe vende të tjera evropiane.

Hulumtimi i ri u fokusua në dy grupmosha specifike: të rinjtë e moshës 15 deri në 24 vjeç dhe të moshuarit e moshës 70 vjeç e lart.

Jocelyn Caboche, drejtoreshë e kërkimit në Qendrën Kombëtare Franceze për Kërkime Shkencore, thekson se nuk ka asnjë shpjegim të thjeshtë përse Franca ka një nivel relativisht më të lartë të depresionit se vendet e tjera, por mund të jetë për shkak të “një grumbullimi faktorësh të ndryshëm”.

“Megjithëse kemi shërbime relativisht të mira shëndetësore dhe arsimore, ende nevojiten investime të konsiderueshme në kujdesin e të moshuarve”, shton Kabos. Ajo beson se situata mund të përmirësohet me investime më të mëdha në psikiatri dhe inovacione terapeutike.

Çfarë po e shkakton depresionin në Evropë?

Në Portugali, Rumani dhe Kroaci, shkalla e depresionit tek të moshuarit kalon 15 për qind. Sipas të dhënave, gratë e moshuara janë më të ndjeshme ndaj depresionit sesa burrat, dhe ato me shëndet të dobët kanë më shumë gjasa të jenë në depresion.

Duke pasur parasysh se në Evropën Lindore dhe Jugore një numër i madh i të moshuarve raportojnë shëndet të dobët, kjo mund të shpjegojë pse depresioni është më i zakonshëm në ato vende. Për shembull, në Kroaci dhe Letoni, ku pothuajse 40 për qind e të moshuarve raportojnë shëndet të dobët, shkalla e depresionit është 16 dhe 9 për qind.

Izolimi social dhe humbja e partnerit janë gjithashtu faktorë që kontribuojnë në rritjen e depresionit tek të moshuarit.

Ku është depresioni më i përhapur tek të rinjtë?

Ndër të rinjtë evropianë, normat më të larta të depresionit vërehen në Danimarkë, Suedi dhe Finlandë, të ndjekura nga afër nga vendet e Evropës Perëndimore. Nga ana tjetër, depresioni është më pak i përhapur tek të rinjtë në Evropën Lindore dhe Jugore.

“Unë u godita nga ndryshimet midis niveleve të depresionit midis të rinjve dhe të moshuarve në Evropën Juglindore dhe nga fakti se të rinjtë në Evropën Veriore janë dukshëm më të ndjeshëm ndaj depresionit, ndërsa te të moshuarit zvogëlohet me moshën”, thotë Lisa Troy, autore e studimit.

Në vendet me shkallë më të lartë të depresionit tek të rinjtë, ai shoqërohet me izolim social, papunësi ose mosarsimim, si dhe nivele më të ulëta të të ardhurave.

Kabosh shton se mediat sociale gjithashtu kanë një ndikim negativ duke inkurajuar krahasimet e dëmshme sociale, shqetësimet për imazhin e trupit, veçanërisht tek vajzat, më pak gjumë dhe një rrezik në rritje të bulizmit në internet. Shëndeti i dobët tek të rinjtë, sipas hulumtimeve, rrit ndjeshëm rrezikun e depresionit, deri në 32 pikë përqindjeje.

Autorët e studimit paralajmërojnë se të dhënat nga Anketa Evropiane e Shëndetit kanë kufizime të caktuara, duke përfshirë dallimet në metodat e studimit të shëndetit mendor në vende të ndryshme. Megjithatë, hulumtimi tregon qartë se depresioni mbetet një problem i rëndësishëm në Evropë dhe se nevojiten mekanizma më të mirë për ta trajtuar atë.