Lajm i mirë për Kosovën, Shkriniar mungon në ndeshjen e “Play-Off-it”

Klubi i njohur turk, Fenerbahçe ka lëshuar një deklaratë për lëndimin e mbrojtësit Milan Shkriniar duke zbuluar dëmtimin e lojtarit, i cili përfundimisht pritet të mungojë në ndeshjen mes Sllovakisë dhe Kosovës në kuadër të ‘play-off’-it për Kupën e Botës 2026.

Shkriniar u lëndua të enjten mbrëma në ndeshjen e Ligës së Evropës kundër Notingam Forestit, duke u detyruar ta lë fushën në minutën e 26-të.

Lëndimi i tij dukej serioz që në pamje të parë dhe Fenerbahçe ka lëshuar një deklaratë në lidhje me gjendjen e fundit të Shkriniarit.

“Pas dëmtimit që pësoi kapiteni i ekipit tonë të futbollit, Milan Shkriniar, gjatë ndeshjes së mbrëmshme kundër Notingam Forest, iu krye një skanim me rezonancë magnetike. Si rezultat i vlerësimit, u zbulua një këputje e pjesshme në ijën e tij të djathtë dhe ka filluar trajtimi për lojtarin tonë”, thuhet në njoftimin e klubit turk.

Sipas një raporti në mediumi “A Spor”, qendërmbrojtësi sllovak do të jetë jashtë fushave për 1 muaj e gjysmë, duke humbur kështu ndeshjen me Kosovën e planifikuar për 26 mars.