Leklerk: Së shpejti do të kemi një Ferrari më të shpejtë në pistë

Piloti i Ferrarit, Sharll Lekler, nuk është aspak i shqetësuar për dy rezultatet e arritura në dy garat e fundit (Imola dhe Majami), ku është parakaluar e mundur nga Maks Verstapeni i skuadrës “Red Bull”.

“Nuk shqetësohem. Natyrisht ata janë përmirësuar, por këtë gjë e prisnim. Gjithsesi, edhe ne jemi një skuadër e fortë dhe jemi të vetëdijshëm për këtë gjë. Unë kam besim te skuadra ime dhe jam i bindur se shumë shpejt do të shohim një Ferrari më të shpejtë në pistë. Presim përmirësimet në makinë, që do ta përmbysin situatën. Ne punojmë fort, ashtu sikurse kemi punuar gjatë dy viteve të fundit për t’u rikthyer protagonistë”, tha më tej piloti i “kokëkuqes”.

“Sezoni është ende në fillim dhe po shohim një rivalitet të fortë me Red Bull. E rëndësishme është të jemi konstantë dhe të mos humbasim pikë. E dimë që do të jetë një sezon i vështirë, ku do të ketë edhe momente të vështira, por duhet të mos tërhiqemi në asnjë moment”, u shpreh Leklerk.