Lesteri mund Junajtedin, Siti shpallet kampion

Mançester Siti është shpallur kampion në Premier Ligë, pasi rivalët e tyre më të afërt, Mançester Junajtid, janë mundur në ndeshjen ndaj Lesterit dhe në javët e mbetura nuk kanë matematikisht mundësinë që të rikuperojnë pikët që ndajnë dy skuadrat.

Tomas i dha avantazhin Leisterit por Shou barazoi shifrat para fundit të pjesës së parë. Megjithatë, një goditje me kokë e Sojunçu siguroi fitoren 2-1 të Leisterit në pjesën e dytë dhe përveçse ndihmoi skuadrën e tij të siguronte pozitat për një vend në Ligën e Kampioneve, i dorëzoi titullin Mançester Sitit.

Ky është titulli i tretë kampion i fituar nga Pep Guardiola në Angli në katër vitet e fundit, shifra mbresëlënëse për një klub i cili deri dy dekada më parë ishte thuajse në harresë të plotë.

Për skuadrën e drejtuar nga tekniku spanjoll, ky sezon mund të jetë me të vërtetë mbresëlënës pasi ka fituar edhe Kupën e Ligës, ndërsa është edhe në finalen e Ligës së Kampioneve që e luan ndaj Çelsit.