Milani, në kërkim të Iskos dhe Zhiru-s
Milani është grumbulluar këtë të enjte për të nisur përgatitjet për sezonin e ri me trajnerin Pioli që ka patur në dispozicion vetëm futbollistët që nuk kanë qenë të impenjuar në “Euro 2020”, me veteranin Zlatan Ibrahimovic. Maldini dhe Massara, dy njerëzit e merkatos kuqezi po punojnë për të vendosur në dispozicion të trajnerit Stefano Pioli edhe dy element të tjerë cilësorë, një sulmues dhe një mesfushor ofensiv.
Të preferuarit e Maldinit janë Isko për mesfushën dhe Oliver Zhiru për repartin e avancuar. Sipas mediave spanjolle, Milani e ka bërë tashmë një tentativë për Iskon duke i ofruar Realit të Madridit 15 milionë euro për kartonin e mesfushorit të cilit kontrata me Los Blancos i skadon në verën e vitit të ardhshëm. Vet Isko dëshiron largimin nga “Santiago Bernabeu”, pasi e ka të qartë që nuk bën më pjesë në planet e trajnerit Karlo Ançeloti.
Përsa i përket zëvendësit të Ibrahimovic, Olivier Zhiru, mbetet objektivi kryesor i Maldinit. Sulmuesi 34-vjeçar ka rinovuar edhe për një sezon me Çellsin dhe për t’ia shkëputur bluve të Londrës, Milani duhet të paguajë një shifër modeste, ndërkohë që me vetë lojtarin e ka arritur akordin për një kontratë 2-vjeçare nga e cila Zhiru do të përfitojë 4 milionë euro në sezon.
