Без прв час во училиштата во Србија, наставниците на предупредувачки штрајк
Вработените членови на Синдикатот за образование на Србија денеска ќе одржат предупредувачки штрајк, така што нема да се одржи првиот час во прва и во втора смена во училиштата.
Во соопштението на Синдикатот се наведува дека барањето на штрајкувачите е српската влада да почне да го применува Законот за плати на вработените во јавниот сектор од 1 јануари 2022 година. Доколку не почне примената на тој закон, за сите вработени во образованието платите да бидат зголемени за 15 отсто.
Синдикатот за образование на Србија бара и изедначување на цената на трудот за сите дејности во образованието, формирање паралелки со помал број ученици во основните и во средните училишта, како и стручни соработници и ненаставен кадар финансиран сразмерно на број на часови.
„Вработените во образованието речиси две години работат во тешки пандемиски услови и го одржуваат образовниот процес во вонредни околности. Не е познат бројот на болни вработени и ученици, а Владата и Министерството за образование, наука и технолошки развој се глуви на апелите на синдикатот дека просветните работници се материјално и професионално понижени“, се вели во соопштението.
