Експерти: Обидот за законски измени за платите на функционерите е фарса!

Пакетот од 6 предложени закони се очекува да биде изгласан во Собранието по завршувањето на сите процедури. Но, за економските експерти ова како што велат е фарса и се прави за да се ублажи револтот на граѓаните кои беа против зголемувањето на платите на функционерите за 78 отсто. Сега се предлага намалување на коефициентот на плата за овие високи примања на избраните и именувани лица, да не се зголемат за дополнителни 15%. Станува збор за 1060 функционери. Но, дури и ваквите законски измени да бидат донесени, сепак околу 200 директори именувани директно од Владата ќе може во април да добијат повисоки плати. Евентуалното намалување на нивните коефициенти ќе зависи од самата Влада.

„Ова ќе го гледаме во иднина, ќе има големи реперкусии затоа што ќе има ефект на прелевање „spillover effect“ како што го нарекуваме во економијата или домино ефект за сите оние професии кои ги ограничија зголемувањата на платите. Ќе биде потребно платите да се пресметуваат исто како и за службениците. Незамисливо е да се зголемат трошоците за живот и цените, а да се зголемат и платите на службениците. Тогаш значи дека граѓаните го финансираат зголемувањето на платите, кои сè уште се високи, а со нивото на корупција во С Македонија, ваквиот тренд е прилично вознемирувачки“, вели Висар Адеми, економски експерт.

Против овие закони имаше остри замерки од дел од политичките партии, особено од ДУИ, која немаше консензус во Владата, што ја турна пратеничката група на СДСМ да преземе иницијатива преку своите пратеници. „За“ овие законски измени се изјаснија од ВМРО-ДПМНЕ и од албанската коалиција ВРЕДИ. Но, судиите се закануваат дека ќе ги преземат сите правни механизми за да ги оспорат овие предложени законски измени и тоа најверојатно во Уставниот суд. Имено, судиите сметаат дека им се прекршува правото на зголемување на платите. Од Судскиот совет велат дека тоа би значело и напад врз нивната независност.

„Интервенцијата во намалувањето на коефициентот на личните примања на судиите претставува директен напад на независноста на судството. Наместо очекуваното зголемување на коефициентот договорен преку шестгодишниот дијалог со Владата, денеска сме сведоци на суспензија на договорот со образложение дека е дадено стабилно уставно решение. Од тие причини уште еднаш го повикуваме предлагачот да ги повлече овие измени, со што ќе се избегнат непотребните трошоци за државниот буџет, во случај на евентуална реакција на судиите во соодветна судска постапка“, наведуваат од Судскиот совет.

Инаку, со бришењето на законската основа од страна на Уставниот суд, зголемувањето на платите на функционерите од март 2023 година стана променливо во зависност од зголемувањето на просечната плата во земјава. Но, ниту со промената на овие 6 закони, според експертите, нема гаранција дека во наредната година со коригираните коефициенти нема дополнително да дојде до зголемување на платите на функционерите, бидејќи тоа ќе го диктира растот на просечната плата.

Аднан Ќаили