Граѓани се пријавуваат во системот, а потоа не доаѓаат да се вакцинираат

Иако вакцинацијата е доброволна некои луѓе се премислуваат и не се појавуваат во закажаниот термин. Тоа ги загрижи здравствените власти кои велат дека колективниот имунитет не може да се постигне преку вакцинација, ако многу граѓани не се вакцинираат. Во спортската сала Борис Трајковски медицинскиот персонал се обидува да ги сензибилизира граѓаните за доброволно да се пријавуваат за вакцинација.

„Веќе две недели по 100 пациенти доаѓаат на еден пункт и се вакцинираат. Тука има 48 пунктови и процесот се одвива добро. Понекогаш прашуваат каква вакцина ќе примат, ние им објаснуваме за видот и за дозите, ги ослободуваме од тремата да не се плашат затоа што сè ќе биде добро.“

Од Центарот за јавно здравје во Скопје велат дека непроверени информации предизвикуваат дилеми кај граѓаните во однос на вакцинацијата. Причините не ги знаат, но директорот Бесим Зеќири повикува за сите дилеми граѓаните да се обраќаат исклучиво до официјалните здравствени тела за веродостојноста на имунизацијата од која било вакцина која е одобрена од американската или европската организација за лекови.

„На пример има луѓе кои биле повикани од работните организации да се вакцинираат и сè уште се двоумат дали да се вакцинираат или не. Апелирам да се појават во поголем број и да се вакцинираат. Начинот на пријавување е преку матичен лекар, преку работните организации и преку веб-страницата „вакцинација.мк“ што е отворена од Министерството за здравство, да ги внесат нивните податоци за да закажат термин и место за вакцинација.“

Според евиденцијата на „Мој термин“ досега десетици повозрасни граѓани не се пријавиле во закажаното време за да ја примат вакцината Aстра Зенека. Од електронската платформа не може да се пресмета вкупниот број на оние што се премислиле бидејќи од категориите загрозени од првата фаза има и други кои не се евидентирале во системот како случаи кои ја одложиле или се откажале од вакцинацијата.

Аднан Ќаили