Францускиот претседател Емануел Макрон оцени дека „постои ризик Европа да умре“ и дека за ЕУ клучни прашања се безбедноста, економијата и културата. За време на своето обраќање на Универзитетот Сорбона во Париз, Макрон истакна дека битката за изградба на силната Европа е далеку од освоена и дека постои ризик да заостане зад светските ривали во наредната деценија, пренесува Ројтерс.
Европа, како што оцени Макрон, е на пресвртна точка и мора да стори повеќе за да се натпреварува со забрзаното вооружување на своите глобални ривали. Тој, исто така, истакна дека ЕУ мора „да воспостави дијалог со земјите од Третиот свет и да покаже дека не е вазал на Соединетите Американски Држави“. Тој исто така посочи дека Европа мора да стане свесна за фактот дека не е доволно вооружена пред, како што рече, глобалните закани, како што е руската војна во Украина.
Макрон истакна дека моделот на економски раст на ЕУ мора да се промени бидејќи сегашниот не е одржлив и дека ЕУ заостанува во „глобален контекст во кој се доведуваат во прашање принципите на слободната трговија“.
