Меџити бара резултати од истрагата за случајот на онкологија
Министерот за здравство, Фатмир Меџити го повика Обвинителството да излезе со конкретни информации за скандалот на Клиниката за Онкологија по сомневањата дека на пациентите им бил даван физиолошки раствор место биолошка терапија.
„Крајно време е веќе Обвинителството да излезе точно со име и со презиме за Онкологија, зашто овој костум што го гледате на мене денеска, оваа вратоврска ме задушува. Јас, денеска, најубаво се чувствувам тука и имам емоции. Да ви кажам дека ми прилега белиот мантил и од првиот ден ви кажав дека не претпочитам да бидам политичар од некоја партија, туку ќе бидам лекар и тоа и ќе останам и заедно со моите колеги и заедно со вас ќе ги подобриме работите“, рече министерот по посетата на обновените амбуланти на Клиниката за неврологија.
