Рама: Зеленски ќе учествува на самит за Украина во Тирана

Албанскиот премиер Еди Рама најави дека во Тирана ќе се одржи самит за Украина, на кој ќе учествува и претседателот на земјата, Володимир Зеленски, но не прецизираше кога ќе се одржи состанокот.

Рама ова им го кажа на новинарите на 22 јануари во Скопје, по конференцијата со лидерите на Западен Балкан „План за раст на Западен Балкан и брза интеграција во ЕУ“.

„Подготвуваме самит во Тирана за Украина, а ќе биде присутен и претседателот Зеленски. Во исто време ќе се обидеме да ја имаме следната средба на лидерите од регионот со оние кои се уште денес таму и ќе го следат овој процес“, рече Рама, мислејќи на Европската комисија и американската администрација.

Сепак, Рама не кажа кога ќе се одржи овој самит за Украина во главниот град на Албанија. Украина речиси две години е под руска агресија.

Албанскиот премиер рече дека самитот во Тирана ќе биде за поддршка на Украина и дека со Зеленски и другите учесници ќе се разговара за безбедносните предизвици.

На 15 јуни 2022 година, заедно со тогашниот премиер на Црна Гора, Дритан Абазовиќ, Рама престојуваше во Киев и се сретна со Зеленски. Албанија, како и другите земји во регионот со исклучок на Србија, воведе санкции кон Русија поради нејзината инвазија на Украина и понуди поддршка на Киев./RSE/