Со масовни тепачки, повредени и уапсени, Норвешка го прослави укинувањето на ковид-ограничувањата

Тепачки, повредени и уапсени. Вака заврши прославата на укинувањето на ковид-ограничувањата во Норвешка. Норвежаните го прославија крајот на мерките против коронавирусот со неколку викенд-забави – ноќните клубови и пабови беа полни, а атмосферата на многу места беше тензична.

Во градот Трондхајм неколку луѓе побарале медицинска помош откако се онесвестиле додека чекале во долгите редици.

Тепачки се регистрирани во неколку града, со повредени и уапсени, објави денеска јавната телевизија НРК.

„Имаше прекршувања, насилни инциденти и тепачки“, рече Руне Хекелштранд, припадник на полицијата во Осло.

Неколку луѓе се уапсени за поседување оружје, а некои се и тешко повредени.

Во градот Тонсберг, јужно од главниот град, во пристаништето избила масовна тепачка, а во југозападниот регион Агдер, вкупно 12 лица беа уапсени за немирите.

Норвешка во саботата ги укина речиси сите мерки против коронавирусот – нема веќе физичка дистанца, а не се применуваат ни ограничувањата за бројот на луѓе на настани и собири.

Остана само задолжителниот карантин во случај на инфекција. Ограничувањата за влез, исто така, се отстрануваат постепено.