Судењето за Беса Транс по 90 дена почна од почеток

90 дена по одржувањето на последната седница денеска конечно продолжи судењето за „Беса-Транс“. Сопственикот на компанијата Беким Хаџиу и претставникот Хајредин Муча, како странки обвинети за фалсификување на дозволата за автобусот во кој загинаа 45 лица, уште еднаш пред судот рекоа дека не се чувствуваат виновни.

Потоа беше сослушан претставникот на Царината, Драган Василевски. Тој појасни дека царината има систем кој ги снима излезите на автобусите надвор од границата наречен ЕКСИМ. Според него, без исполнување на условите, ниту еден автобус не смее да ја напушти државата.

„Беса транс неколку пати е евидентирана во системот, бидејќи е редовен превозник, има докази дека излегла. За да помине автобус, тој мора да има: вид на дозвола (извоз, увоз…), име на превозник, број на превозник, број на дозвола, регистарски таблички, број на сертификат за лиценца, име на возачот, сертификат, список на патници, место каде што е регистриран превозникот“, рече Василевски.

Адвокатот на сопственикот на Беса Транс, Асмир Алиспахиќ, го праша царинскиот претставник дали тоа значи дека „Беса транс“ има оригинална потврда и ги исполнува сите потребни услови. Тој одговори дека не може да дава заклучоци во врска со ова.

Останува нејасно како автобусот, иако немал дозвола за меѓународен превоз, 20 пати успеал да ја напушти државата. Според Алиспахиќ, овој одговор треба да се бара на друго место – но, вели дека потврдата што ја користел испитаникот не е фалсификувана.

Според обвинението, сопственикот на Беса Транс Беким Хаџиу преку возачите кои го управувале автобусот користел потврда за дозвола која не била издадена од Министерството за транспорт и врски. Ова доведе до суспензија на двајца царински службеници еден ден по несреќата.

Ардит Рамадани