Уште двајца обвинети признаа вина за „Двојник“

Се редат, признанија во случајот „Двојник“. Нови двајца обвинети признаа дека биле дел од групата која со години издавала лажни пасоши на криминалци од регионот. Сега вкупно седум лица признаа вина, а една обвинета која е болна преку адвокатот најави дека и таа ќе признае вина кога ќе се појави во судница. Денеска паднаа две затворски казни. Шемседин Јашари доби една година и седум месеци.

„Обвинетиот заедно со другите обвинети и осудени ја нарушил националната безбедност како на Република Северна Македонија така и на други држави. Обвинетиот овие дејствија ги направил во девет наврати“, рече Оља Ристова, судијка.

„Денеска ја признавме вината со цел да се ублажи казната предвидена за ова кривично дело до три години и мислам дека казната е соодветна на тоа што обвинетиот го направил“, рече Љупчо Веселиновски, адвокат.

Две години и пет месеци доби и Оливера Софрониевска која призна вина. Таа одобрила издавање на 198 лажни пасоши. Обвинителката не била изненадена од потегот, обвинетите да признаваат вина со оглед на бројноста на доказите против нив. Зборуваше и за материјалната корист која евентуално ја стекнале низ годините осудените и обвинетите.

„Во конкретниот случај не располагаме со точни податоци за парични средства или висина на парични средства кои се прибавени од нивна страна“, рече Спасенка Андонова, обвинител.

Сега на обвинителна клупа останаа само тројца обвинети кои од вторник ќе треба да докажуваат дека не се виновни. Меѓу осудените има шест службеници во МВР и посредникот за пасоши Раиф Мифтари. Според обвинението издадени биле 215 лажни пасоши, најчесто на лица со криминално минато. Според истрагата на полицијата, лажен пасош на црниот пазар чинел и до 20 илјади евра.

Бојан Стојановски