Nis Liga e Kampionëve me formatin e ri, njihuni me skuadrat favorite

Sonte do të fillojë sezoni i ri i Ligës së Kampionëve, i cili mund të thuhet se është historik në shumë aspekte. Nga ky sezon, garat elitare evropiane për klube nuk do të jenë në formatin e saj të njohur me tetë grupe nga katër skuadra, gjë që sigurisht do të marrë pak kohë për mësim.

Është rritur edhe numri i skuadrave, kështu që këtë sezon 2024/25 në Ligën e Kampionëve në vend të 32 do të shohim 36 skuadra që do të jenë të gjitha së bashku në një tabelë.

Në pjesën e garës së ligës, secila skuadër do të luajë nga tetë ndeshje kundër kundërshtarëve që u tërhoqën në shortin e 29 gushtit dhe tetë skuadrat e para do të kalojnë direkt në fazën e 1/8-tës. Ekipet nga vendi i 9-të në të 24-të pas tetë xhirove të luajtura do të kalojnë në ‘play-off’ për një vend në fazën e 1/8-tës. 12 skuadrat e fundit në tabelë do të përfundojnë pjesëmarrjen në Evropë këtë sezon, çka do të thotë se nuk ka më transferim në Ligën e Evropës siç ishte në sezonet e mëparshme.

Turi i parë i Ligës së Kampionëve do të luhet nga e marta në të enjte, ndërsa shtatë të tjerat, si më parë, gjatë të martave dhe të mërkurave. Raundi i fundit është caktuar për 29 janar, ndërsa faza e eliminimit fillon më datë 11 shkurt. Finalja e madhe do të luhet më 31 maj në Allianz Arena të Mynihut.

E ndërsa formati i garës është i ri, favoritët për titull janë ende të njëjtat klube si: Man. Siti, Real Madrid, Arsenal dhe Bajern Munih janë në krye të listës sipas shtëpive të basteve, ndërsa Interi, Barcelona, Liverpulli dhe Paris Sen Zhermen shihen si favoritë të fshehur.

Ndeshjet e ditës së martë (17 shtator)

Juventus – PSV Aindhoven                          18:45

Jang Bojs – Aston Villa                                 18:45

Milan – Liverpulli                                          21:00

Bajern Munih – Dinamo Zagreb                   21:00

Real Madrid – Shtuttgart                              21:00

Sporting Lisbona – Lille                                21:00