Një tërmet me magnitudë 5.0 godet Spanjën jugore

Një tërmet me magnitudë 5 ballë goditi rajonin e Granadës në Spanjën jugore herët këtë mëngjes, me epiqendër në Alhendín, thanë autoritetet spanjolle. 

Nuk pati raportime të menjëhershme për të lënduar, por pati dëme materiale. 

“Një natë trazirash në Granada pas një tërmeti me magnitudë 5 që shkaktoi dëme materiale, me dridhje të ndjera edhe në disa provinca të tjera”, tha kryeministri andaluzian Juanma Moreno nëpërmjet X.

“Le të qëndrojmë të qetë dhe të jemi shumë të kujdesshëm rreth çative dhe fasadave të dëmtuara që mund të shemben ende, dhe ju lutemi ndiqni të gjitha rekomandimet”, u tha ai banorëve. Shërbimi i urgjencës 112 mori më shumë se 200 thirrje nga qytetarët.

Instituti Kombëtar Gjeografik Spanjoll (IGN) fillimisht vlerësoi magnitudën e tërmetit në 4.8, por më vonë e rriti atë në 5. Tërmeti ndodhi në një thellësi prej dy kilometrash.

Rrëshqitje dheu, rrëzime pjesësh të fasadave dhe çative dhe dëme të tjera materiale u regjistruan në disa vende në Granada. Në Las Gabias, një ndërtesë u evakuua si masë paraprake për shkak të dëmtimeve të dyshuara.

Qyteti i Huetor Vega mbeti pa energji elektrike. Autoritetet e qytetit të Granadës thanë se nuk kishte dëme serioze ose të përhapura gjerësisht, por se dëmet individuale po verifikohen.