OBSH bën thirrje për masa më të ashpra për të frenuar variantin e ri të koronavirusit

Organizata Botërore e Shëndetësisë u ka bërë thirrje vendeve evropiane të bëjnë më shumë për të frenuar variantin e  ri të koronavirusit që u zbulua për herë të parë në Mbretërinë e Bashkuar.

Drejtori i OBSH-së në Evropë, Hans Kluge tha se duheshin masa më të ashpra për të “rrafshuar vijën e pjerrët vertikale” të rasteve në rritje në disa vende. Ai shtoi se 22 vende evropiane tani kanë raste të këtij varianti, ndërsa situatën e cilësoi si alarmante.

Përhapja e tij ka shqetësuar shumë vende evropiane që kanë vendosur tashmë bllokime të plota kombëtare për të luftuar një rritje të dukshme të infeksioneve gjatë dimrit. Ekspertët e shëndetit thonë se varianti është dukshëm më i transmetueshëm sesa llojet e mëparshme, por jo domosdoshmërisht ndonjë më i rrezikshëm për të infektuarit.

Ata gjithashtu kanë minimizuar mundësinë që vaksinat të mos jenë aq efektive ndaj variantit. Sidoqoftë, Kluge tha se “transmetueshmëria e shtuar dhe ashpërsia e sëmundjes së ngjashme” të variantit “ngre alarm”.

“Vlerësimi ynë është që ky variant, me kalimin e kohës, mund të zëvendësojë linjat e tjera qarkulluese – siç shihet në Mbretërinë e Bashkuar dhe gjithnjë e më shumë në Danimarkë,” tha Kluge të enjten.

“Pa kontroll të shtuar për të ngadalësuar përhapjen e tij, do të ketë një ndikim të shtuar në objektet shëndetësore tashmë të stresuara dhe nën presion.”

Shfaqja e variantit në Anglinë jug-lindore shkaktoi kufizime të udhëtimit me dhjetëra vende në dhjetor.

Franca u ndalon hyrjen udhëtarëve nga Britania deri në një njoftim tjetër, përveç nëse ata janë shoferë kamionësh ose shtetas të BE-së në udhëtime thelbësore, të cilët gjithashtu duhet të paraqesin një test me rezultat negativ për Covid-19 nga tre ditët e mëparshme.

Cila është situata e koronavirusit në Evropë?

OBSH thotë se më shumë se 230 milion njerëz në Evropë jetojnë në vende nën bllokim të plotë kombëtar, me më shumë që pritet të njoftojnë kufizime të mëtejshme së shpejti.

Që nga e mërkura, pothuajse gjysma e të gjitha vendeve evropiane regjistruan 150 raste të reja për 100,000 njerëz gjatë një periudhe shtatë ditore, sipas OBSH. Një e katërta e të gjitha vendeve anëtare të BE, thotë OBSH, “po shohin incidencë shumë të lartë dhe sisteme të tensionuara shëndetësore”.

Numri më i lartë i infeksioneve është regjistruar në Rusi (3.2 milion), MB (2.8 milion), Francë (2.7 milion) dhe Itali (2.2 milion), sipas një liste nga Universiteti Johns Hopkins .

Numri më i lartë i vdekjeve është regjistruar në Britaninë e Madhe (78,000), Itali (77,000), Francë (66,000) dhe Rusi (59,000). Franca hoqi bllokimin e saj kombëtar në dhjetor, por qeveria tha se shkalla e infeksionit nuk kishte rënë sa duhet për një lehtësim të mëtejshëm.

Të enjten kryeministri Jean Castex tha se restorantet, kinematë dhe muzetë do të qëndronin të mbyllura gjatë gjithë janarit për të ngadalësuar përhapjen e koronavirusit.

Në Spanjë, shifrat qeveritare treguan se numri i përgjithshëm i rasteve me koronavirus u rrit mbi dy milion të enjten. Ministria e shëndetësisë njoftoi edhe 42,360 raste të tjera gjatë 48 orëve të fundit.

Gjermania ka zgjatur karantinën në të gjithë vendin deri në fund të Janarit. Kancelarja Angela Merkel paralajmëroi se spitalet në të gjithë vendin ishin tashmë të mbingarkuar, veçanërisht njësitë e kujdesit intensiv.

Në Itali , kufizimet e vendosura gjatë Krishtlindjes u zgjatën deri në 15 janar, ndërsa në Greqi qeveria futi një bllokim të rreptë nga 3 Janar në 11 Janar. Ndërkohë, vaksinat kundër Covid-19 po shpërndahen në të gjithë Evropën, por me një ritëm që është kritikuar si shumë i ngadaltë në disa vende.