Pas tensioneve diplomatike, Baerbock viziton Ukrainën
Pas tensioneve diplomatike, Baerbock viziton Ukrainën
Ministrja e Jashtme gjermane Annalena Baerbock ka vizituar sot Ukrainën, duke bërë ndalesën e parë në Bucha. Baerbock vizitoi një kishë në qytet ku prokurorët po hetojnë nëse krimet e luftës janë kryer nga trupat ruse.
Ajo gjithashtu pa nga afër situatën, e shoqëruar nga prokurorja e përgjithshme ukrainase Iryna Venediktova. Baerbock është anëtarja e parë e kabinetit gjerman që udhëton në Ukrainë që nga shpërthimi i luftës në vend, dhe udhëtimi i saj vjen pas një periudhe tensioni diplomatik midis Gjermanisë dhe Ukrainës.
Presidenti gjerman Frank-Walter Steinmeier tha se do të vizitonte Kievin në prill në një udhëtim të përbashkët me krerët e shteteve të Polonisë, Lituanisë, Letonisë dhe Estonisë, por zyrtarët ukrainas thanë se nuk donin që ai të vinte.
Vendimi erdhi mes kritikave të vazhdueshme për marrëdhëniet e ngushta të Steinmeier me Rusinë në rolin e tij të mëparshëm si ministër i Jashtëm, si dhe kritikat nga Kievi se Gjermania hezitonte të ofronte mbështetjen e nevojshme ushtarake për Ukrainën.
Në fillim të majit, kancelari gjerman Olaf Scholz tha se nuk kishte plane të vizitonte Ukrainën pas refuzimit të Steinmeier nga Kievi. Por mosmarrëveshja u zgjidh më 5 maj kur Steinmeier dhe Zelensky zhvilluan një bisedë telefonike, sipas zyrës së Presidentit gjerman.
