PDSH hesht për lëvizjen eventuale të Thaçit – BDI thonë se grupi parlamentar është stabil

Gazetar: Zekirija Haxhiu

Fronti Europian për momentin është kompakt dhe funksionon në përbërje të plotë pohoi deputeti Blerim Bexheti, shkruan Alsat.

Ndonëse në opinion flitet që kreu i PDSH-së Menduh Thaçi pritet t’i bashkohet shumicës parlamentare dhe të bëhet pjesë e ekzekutivit, këtë gjë nuk e konfirmojnë nga Fronti Europian.

“Grupi parlamentar funksionon në përbërje të plotë dhe unë dhe unë nuk di çfarë të shtoj më shumë, e ti komentoj deklaratat e parëndësishme që kolegja juaj tha nuk e shoh të arsyeshme.
Z.Thaçi është pjesë e grupit parlamentar të Frontit Europian ose jo?
Po, po po!”, tha Blerim Bexheti – Fronti Europian.

Kreu i Lëvizjes Besa, pjesë e koalicionit VLEN, Bilall Kasami, nuk beson se Thaçi mund t’i bashkëngjitet Qeverisë.

“Veprimet e z.Thaçit duhet ti komentojë ai vet. Unë s’kam koment. Nëse bëhet pjesë e Qeverisë, ju a do të vazhdoni të qëndroni aty? Nuk kam koment dhe nuk besoj se do të jetë pjesë e Qeverisë”, tha Bilall Kasami – VLEN.

Dyshimet e para për largimin e Thaçit nga Fronti Europian u paraqitën në ditën kur ky koalicion mbajti konferencë për 100 ditëshin e Qeverisë. Thaçi mungoi në këtë mbledhje. Nga partia e tij nuk dhanë asnjë sqarim për mungesën e tij.

Por Thaçi s’ishte i vetëm që mungoi në atë ngjarje. Munguan edhe Bejxhan Iljas nga PDT dhe Fatima Osmanovska nga Unioni i Romëve.

Kjo e fundit, për Alsat njoftoi se raportet me Frontin Europian janë ashtu siç kanë qenë në fillim. Për mungesën në konferencë, arsyetohet me angazhime tjera të partisë.

“Ajo që mund të them për ne si parti politike Unioni i Romëve ta them, në mbledhje nuk morëm pjesë për shkaqe të arsyeshme për obligime të caktuara paraprakisht mirëpo ajo që mund të konkludoj është se komunikimi mes të gjitha partive të kyçura politike është se kemi komunikim të pandërprerë dhe se bashkëpunimi vazhdon në nivelin e njëjtë ashtu siç është filluar”, tha – Fatima Osmanovska – Kryetare e Unionit të Romëve.

Ditë më parë zv.kryeministri i parë Izet Mexhiti tha se ai vet personalisht nuk ka biseduar me Thaçin për përfshirjen në Qeveri por se këto paralajmërime për të paraqesin shenjat e para të destabilizimit të Frontit, dhe e quajti fillimi i fundit të tyre.

Largimi i Thaçit nga koalicioni do të ulte në 17 numrin e deputetëve të Frontit Europian./ Alsat.mk