Prilepi mund të hyjë në karantinë, shkak rritja e numrit të të infektuarve me Kovid-19

Kryetari i Prilepit, Ilija Jovanovski kërkon që komuna të futet në karantinë. Sipas tij, kjo kërkesë bazohet në rritjen enorme të rasteve të reja me Kovid-19 dhe ngarkimin e kapaciteteve spitalore. Jovanovski thotë se kërkesa e tij bazohet në paralajmërimet për një valë të tretë, e cila sipas tij mund të jetë edhe më fatale për Prilepin.

https://youtu.be/f9ReGj6e-Jw

Në bazë të gjendjes së përkeqësuar shëndetësore të qytetarëve në Prilep dhe numrit të rritur të pacientëve të infektuar dhe të viktimave si pasojë e Kovid-19, kërkojë nga Shtabi i Krizës dhe Qeveria përforcimin e masave shtrënguese dhe masa plotësuese në të gjithë territorin e Komunës së Prilepit – tha Ilija Jovanovski, Kryetar i Prilepit.

Shtabi Krizës ka pranuar kërkesën e tij. Çështja duhet diskutuar si fillim në Ministri të Shëndetësisë dhe më pas edhe në mbledhje të Komisionit për Sëmundje Infektive, i cili duhet të jep mendimin përfundimtar bazuar në pasqyrën epidemiologjike. Burime nga KSI thonë se për këtë çështje do të diskutohet ditën e premte. Në rast se konstatohet nevoja për karantinë apo masa të tjera shtrënguese, Shtabi i Krizës kërkon nga Qeveria vendosjen e Komunës së Prilepit në karantinë duke përcaktuar edhe periudhën kohore. Prilepi muajin e fundit ka shënuar rritje enorme të rasteve të reja. Ditë më parë regjistroi 6 viktima, ndërsa që nga fillimi i pandemisë numëron 120 të vdekur si pasojë e Kovid 19. Numri i rasteve aktive është pranë shifrës 1.000, ndërsa pas Shkupit, Komuna e Prilepit regjistron incidencën më të lartë me të infektuar në 100 mijë banorë, përkatësisht shkalla e incidencës arrin në 2.820. 10 ditët e fundit në Prilep është regjistruar edhe mortaliteti më i lartë krahasuar me komunat simotra.

Adrian Kerimi