Putini pretendon se sanksionet perëndimore ndaj Rusisë kanë dështuar – por ja çfarë thonë kryetari i Moskës dhe ekonomistët
Presidenti rus Vladimir Putin ka thënë se “lufta” e sanksioneve perëndimore ndaj Rusisë ka dështuar.
Duke folur të hënën, Putin tha se Perëndimi “priste që të godisnin shpejt situatën financiaro-ekonomike [të Rusisë], të provokonin panik në tregje, kolapsin e sistemit bankar dhe mungesat në dyqane”.
“Strategjia e goditjes ekonomike ka dështuar”, ka pretenduar ai.
Deklaratat e Putinit pasojnë një paralajmërim këtë mëngjes nga kryetari i bashkisë së Moskës se më shumë se 200,000 vende pune mund të “zhduken” në kryeqytetin rus për shkak të sanksioneve ndërkombëtare.
Madje, Putin tha në televizionin rus se vendi deri më tani i ka rezistuar “presionit të paprecedentë” nga Perëndimi.
Ai pretendoi tutje se rubla ishte forcuar që nga vendosja e sanksioneve dhe Rusia kishte regjistruar një suficit tregtar historik prej 53 miliardë eurosh (58 miliardë dollarë) në tremujorin e parë të vitit 2022, megjithëse Putin pranoi se inflacioni po rritej me shpejtësi në vend.
Humbësit më të mëdhenj nga sanksionet, argumentoi ai, ishin SHBA-të dhe aleatët e saj evropianë, të cilët përballen me çmime më të larta të energjisë si rezultat i veprimeve të tyre.
Sidoqoftë, ekonomistët besojnë se ndikimi më i keq ekonomik i sanksioneve perëndimore kundër Rusisë ende nuk është parë dhe presin që Rusia të zhytet në një recesion të thellë më vonë gjatë vitit.
