Rasti i çuditshëm që tronditi mjekët: Kolli shumë dhe theu kockën më të fortë në trupin e njeriut
Femuri konsiderohet kocka më e fortë në trupin e njeriut dhe një 35-vjeçar banor i provincës Fujian të Kinës arriti ta thyejë atë - duke u kollitur.
Ky rast i pazakontë ka habitur së fundmi mjekët kinezë, sepse frakturat e femurit zakonisht ndodhin si pasojë e traumave të rënda, si rënie nga lartësia apo aksidente automobilistike. Burri i paidentifikuar u ankua te ortopedët se ndjeu një “dhimbje të mprehtë në këmbë” pasi u kollit fort, por mendoi se ishte një spazmë, transmeton “Auditcentral”.
Megjithatë, ai nuk mund të qëndronte në këmbë, ndaj vendosi të shkojë në spital. Rrezet X treguan një femur të thyer, por historia e tij nuk kishte kuptim për mjekët.
Ata vendosën të hetojnë rastin dhe të marrin në pyetje pacientin për shëndetin e tij të përgjithshëm, zakonet, dietën dhe mënyrën e jetesës. Përveç kësaj, ata bënë një analizë të densitetit të kockave, e cila dha rezultate shqetësuese. Doli të ishte e ngjashme me densitetin kockor të një burri 80-vjeçar.
Analizat rezultuan se ai nuk vuante nga sëmundje të tjera, ndaj u arrit në përfundimin se thyerja ishte pasojë e kockave të brishta, dietës së keqe dhe mungesës së aktivitetit fizik.
Burri pranoi para mjekëve se kishte zëvendësuar ujin me pije me sheqer, të gazuara, të cilat ndoshta e pengonin trupin e tij të përthithte siç duhet kalciumin.
