Real Madridi ka arritur të kualifikohet në finale të Ligës së Kampionëve, duke e mposhtur Mançester Citin me rezultat 3-1 në ndeshjen kthyese. Ishin Rodrigo dhe Benzema, ata që eliminuan “qytetarët” falë golave të tyre.
Fillimisht shënoi Rijad Mahrez për “Qytetarët”, por gëzimi i tyre nuk zgjati shumë, sepse “furia” e “mbretërve” nuk do të vononte.
Rodrigo me dy gola e çoi lojën në vazhdime, ndërsa Benzema e vulosi fituesin e takimit dhe e fundosi Man. Sitin. 13-herë kampionët e këtij kompeticioni do të luajnë ndaj Liverpullit në finalen e madhe të Ligës së Kampionëve.
Tifozi me flamur shqiptarë në Bernabeu?
Ndërkohë një tifoz me flamurin shqiptar, u fokusua për disa çaste nga regjia qendrore në supersfidën e Champions-it, mes Realit dhe Mançester Sitit në “Bernabeu”.
Teksa nisi të luhej shtesa e parë, tifozi pushtoi fushën, duke valëvitur flamurin kuqezi. Në këtë moment, regjia e fokusoi kamerën diku tjetër, pasi me rregullore është vendosur, që mos reklamohen ata persona që futen në fushën.
Pas disa sekondash, tifozi me flamurin shqiptar, i cili vrapi drejt Benzemasë, u nxorr nga forcat e sigurisë teksa, ndeshja rifilloi normalisht. Duket se futja e flamurit shqiptar në fushë, i solli fat Realit, që gjeti golin e tretë pak minuta më pas.
