Rusët në Dubai zbulojnë parajsë të re për pasurinë e tyre, blejnë pasuri të paluajtshme dhe hapin biznese

Miliarderët dhe sipërmarrësit rusë po mbërrijnë në Emiratet e Bashkuara Arabe (EBA) në një numër të paprecedentë, kanë thënë udhëheqësit e biznesit për BBC. Blerja e pasurive të paluajtshme në Dubai nga rusët u rrit me 67% në tre muajt e parë të vitit 2022, thuhet në raport.
Emiratet e Bashkuara Arabe nuk kanë vendosur sanksione ndaj Rusisë dhe as nuk e kanë kritikuar pushtimin e Ukrainës. Ata gjithashtu lëshojnë viza për rusët e pasanksionuar, ndërkohë që shumë vende perëndimore i kanë kufizuar ato prej muajsh.
Vlerësohet se qindra mijëra njerëz janë larguar nga Rusia në dy muajt e fundit – megjithëse shifra të sakta nuk janë të disponueshme.
Një ekonomist rus tha se rreth 200,000 rusë u larguan në 10 ditët e para pas fillimit të luftës. Virtuzone, e cila ndihmon kompanitë të fillojnë operacionet në Dubai, ka parë një rritje të madhe të klientëve rusë.
“Ne kemi marrë pesë herë më shumë kërkesa nga rusët që nga fillimi i luftës,” tha kompania, duke shtuar se rusët ishin të shqetësuar për kolapsin e afërt ekonomik. “Kjo është arsyeja pse ata u zhvendosën këtu për të siguruar pasurinë e tyre”, tha një zyrtar i kompanisë.

Fluksi i qytetarëve rusë ka rritur kërkesën për vila dhe apartamente luksoze në të gjithë qytetin. Agjentët e pasurive të paluajtshme po raportojnë një rritje të çmimeve të pronave pasi rusët që mbërrijnë në Dubai kërkojnë të blejnë shtëpi. Agjencia e pasurive të paluajtshme me bazë në Dubai, Betterhomes, ka zbuluar se blerja e shtëpive nga rusët është rritur me dy të tretat në tre muajt e parë të 2022.
Një tjetër agjenci imobiliare, Modern Living, i tha BBC-së se kishte punësuar shumë agjentë rusishtfolës për të përmbushur kërkesën në rritje.

Përveç kësaj, shumë kompani shumëkombëshe dhe startup-e ruse po zhvendosin gjithashtu punonjësit e tyre në Emiratet e Bashkuara Arabe. Lufta pati një ndikim të madh në operacionet e tyre dhe ata zgjodhën Emiratet e Bashkuara Arabe si një “mjedis të sigurt ekonomik dhe politik për biznesin”, thanë ata.
Sfida ishte edhe më e madhe për kompanitë që merren me klientë dhe marka ndërkombëtare, pasi shumica e firmave perëndimore ndërprenë lidhjet me kompanitë me bazë në Rusi. Kompanitë globale si Goldman Sachs, JP Morgan dhe Google, të cilat kanë mbyllur zyrat në Rusi, po zhvendosin gjithashtu disa nga punonjësit e tyre në Dubai.