SHBA: “Kremlini është i përfshirë në sulm ndaj lirisë së medias”
Shtetet e Bashkuara vazhdojnë të lëshojnë viza për gazetarët e kualifikuar rusë dhe nuk kanë hequr kredencialet e asnjë gazetari rus që punon në vend, tha Departamenti i Shtetit të hënën, duke shtuar se Kremlini ishte i përfshirë në një “sulm të plotë ndaj lirisë së medias”, sipas CNN.
Komentet erdhën pas raportimeve të hënën se Rusia kishte paralajmëruar organizatat e lajmeve amerikane se rrezikonin t’u hiqej akreditimi dhe të dëboheshin nëse nuk respektonin të drejtat e gazetarëve rusë në SHBA.
Zëdhënësja e Ministrisë së Jashtme ruse Maria Zakharova tha se rreth një duzinë gazetarëve në Moskë nga media të ndryshme amerikane, duke përfshirë CNN, Associated Press, NBC, washington Post, ABC dhe NPR, u ishin cënuar të drejtat.
Duke reaguar ndaj komenteve, zëdhënësi i Departamentit të Shtetit Ned Price tha se Kremlini vazhdon të bëjë një “ekuivalencë të rreme” midis lirive të shtypit në SHBA dhe peizazhit mediatik në Rusi — ku raportimi i pavarur dhe i saktë mbi luftën në Ukrainë kriminalizohet në mënyrë efektive dhe gazetarët që transmetojnë “informacione të rreme” përballen me dënime të ashpra.
Price vuri në dukje se SHBA-ja ka sanksionuar disa media ruse, duke përfshirë Rusinë 1, Channel One dhe NTV, sepse ato janë “drejtpërdrejt ose indirekt media në pronësi të shtetit dhe të kontrolluara nga Rusia, dhe me të ardhurat prej tyre mbështesin luftën e Presidentit Putin”.
Në takimin me gazetarët të hënën, Zakharova pretendoi se gazetarët rusë po përballeshin me probleme në SHBA, duke filluar nga rinovimi i vizave deri te akreditimi, bllokimi i llogarive bankare dhe ngacmimet e supozuara nga shërbimet speciale të SHBA-së. Ajo u tha përfaqësuesve të mediave amerikane se nëse autoritetet amerikane nuk ndërmarrin veprime, atëherë gazetarët do të duhet të largohen nga Rusia.
