Si të njohim një psikopat në vendin e punës?
Përgjigjen për këtë pyetje e ka dhënë komunikuesi dhe shkrimtari Thomas Erickson, autor i romanit “I rrethuar nga psikopatët”.
“Kjo varet nga pozicioni juaj. Psikopatët ushqehen me fuqi dhe çdo gjë që mund t’u sjellë para dhe vëmendje, ata duan të jenë në plan të parë. Nëse shefi juaj është psikopat, duhet të largoheni prej tij. Ju nuk mund t’i ndryshoni psikopatët, as nuk duan të kurohen.
Është njësoj si t’i thuash një mace të mos ndjekë një mi – ai do të thoshte: “Pse jo?” Unë jam një mace dhe dua të kap një mi”, thotë Erickson.
Ky ekspert thekson se psikopatët nuk do ta quanin kurrë veten psikopatë, por do të thoshin se janë liderë, yje.
Ai pretendon se bota e medias është plot me psikopatë, sepse këtu janë fuqia dhe paratë, dhe ai beson se këta individë priren të ngrihen në çdo organizatë dhe të shfrytëzojnë punëtorët deri në fund.
“Këta janë njerëzit nga të cilët do të dëgjoni: ‘Për të qenë më efektivë, duhet t’i ‘shtyjmë’ njerëzit më shumë. Kjo është një mënyrë e keqe sepse njerëzit nuk janë të shpenzueshëm. Globalisht, ne duhet të punojmë për të kuptuar nevojat e njerëzve dhe mënyrën se si ata punojnë. Ne duhet të kuptojmë se njerëzit duhet të trajtohen me respekt, se përpjekjet e tyre vlerësohen. Është e rëndësishme që të gjithë të njihen, kemi nevojë për lëvdata, por edhe reagime negative. Mirëpo, psikopatët nuk e mendojnë këtë, është krejtësisht e parëndësishme për ta, për ta je një material harxhues që do ta përdorin dhe do ta hedhin”, tha Erikson.
Psikopatët në pozitat e pushtetit u tregojnë njerëzve se si të trajtojnë të tjerët dhe të theksojnë sjelljen e keqe. Hitleri është një shembull i vërtetë i një psikopati që inkurajoi jopsikopatët të bënin gjëra vërtet të tmerrshme, sepse i mbyti në një besim të sëmurë se ata ishin më të mirë se të tjerët. Njerëzit e rrethuar nga psikopatë janë të prirur për të adoptuar mënyra psikopatike të sjelljes edhe pse nuk janë psikopatë, dhe kjo është e rrezikshme.
