Silvinjo me dy ndryshime në formacionin e parë përball Spanjës

Kombëtarja e Shqipërisë do të luajë ndeshjen e fundit të Grupit B ndaj Spanjës, në kuadër të “Euro 2024”. Trajneri Silvinjo tashmë ka vendosur për formacionin që do të inkuadrojë nga minuta e parë. “Kuqezinjtë” do t’i mbyllin ndeshjet e grupeve ndaj “La Rojas”, me ndeshjen që pritet të zhvillohet në “Merkur Spiel-Arena” të Dyseldorfit, me fillim nga ora 21:00.

Trajneri i kombëtares kuqezi, Silvinjo ka bërë të gjitha përgatitjet për këtë ndeshje dhe tashmë ka në mendje formacionin që do ta vendos nga minuta e parë.

Trajneri i Shqipërisë nuk është se do të bëjë shumë ndryshime nga ndeshja me Kroacinë, pasi vetëm dy lojtarë pritet të ndryshohen. Ivan Balliu do ta marrë vendin e Elseid Hysajt, ndërsa Armando Broja do të kthehet nga minuta e parë në vend të Rej Manajt.

Vendin e tij në portë do ta ruajë Tomas Strakosha, ndërsa në mbrojtje përveç Balliut, do të luajnë edhe Arlind Ajeti, Berat Gjimshiti dhe Mario Mitaj. Në mesfushë, do të mbesin lojtarët e njëjtë, treshja e formuar nga Ylber Ramadani, Kristjan Asllani dhe Qazim Laçi.

Edhe në krahët e sulmit, Jasir Asani dhe Nedim Bajramit do të mbajnë vendet e tyre, për të ndihmuar mesfushën dhe Brojën e vetëm në qendër të sulmit.

Arbër Hoxha dhe Ardian Ismajli edhe këtë ndeshje pritet ta nisin nga banka, pasi nuk kanë arritur t’i fitojnë balotazhes me Asanin, respektivisht Ajetin.