Sparkasse Banka me konkurs arti për piktorë të rinj si pjesë e Vevçanski Viduvanja
Në kuadër të „Shp-art-klub“ dhe platformës për përgjegjësi shoqërore Sparkasse LIFE, Sparkasse Banka SHA Shkup dhe Kolonia Ndërkombëtare e Artit „Vevçanski viduvanja (Takimet e Vevçanit)“ shpallin: KONKURS për piktorë të rinj 2026 Sparkasse Banka SHA Shkup i fton artistët e rinj nga vendi, të moshës nga 18 deri në 26 vjeç, të jenë pjesë e Kolonisë Ndërkombëtare të Artit „Vevçanski viduvanja“ (Takimet e Vevçanit). Kolonia do të mbahet në Vevçan dhe do të zgjasë nga 29.6 deri më 10.7.2026.
Tema e konkursit është „Natyra flet“ Nga 3.6.2026 deri më 11.6.2026, të gjithë artistët e rinj të interesuar mund të aplikojnë duke plotësuar formularin e aplikimit në këtë LINK dhe duke dërguar fotografi të një vepre të tyre artistike në teknikë akrilike në: [email protected], me subjekt: „Aplikim për konkurs: Artistë të rinj – Vevçanski viduvanja“ (Takimet e Vevçanit). Pas përfundimit të konkursit, një juri profesionale do të përzgjedhë 10 finalistë, të cilët do të kenë mundësi unike të qëndrojnë 5 ditë në Vevçan, nga 29 deri më 03 korrik 2026.
Të gjitha shpenzimet për qëndrimin dhe transportin, si dhe materialet e nevojshme për pikturim, do të sigurohen nga Sparkasse Banka. “Artistët e rinj janë forca lëvizëse e skenës së re kreative – të guximshëm, autentikë dhe të gatshëm ta ndryshojnë mënyrën se si e shohim botën. Detyra jonë është t’u japim hapësirë që kjo energji të rritet. Përmes platformës për përgjegjësi shoqërore Sparkasse LIFE dhe ‘Vevçanski viduvanja’ (Takimet e Vevçanit), krijojmë mundësi ku talenti merr zë, inspirimi merr formë, ndërsa arti bëhet urë mes të rinjve, natyrës dhe komunitetit. Ne besojmë në ide që lënë gjurmë dhe në të rinj që krijojnë të ardhmen”, deklaroi Ivana Petrevska, drejtoreshë e drejtorisë për marketing dhe komunikim në Sparkasse Banka. Pse të marrësh pjesë? Puna me artistë të rinj, ambiciozë dhe të talentuar që kanë ëndrra të mëdha është nder dhe kënaqësi. Këta individë, me pasionin dhe kreativitetin e tyre, krijojnë thelbin e shpirtit të kombit tonë.
Vizionarët e rinj e formësojnë të ardhmen përmes vizionit të tyre të guximshëm dhe besimit në atë që do të vijë. Pjesëmarrja në këtë projekt nuk ofron vetëm inspirim dhe hapësirë për shprehje, por edhe mundësi për të mësuar teknika të reja pikture, për të marrë mentorim nga artistë të shquar, për t’u shoqëruar me bashkëmoshatarë kreativë dhe për të zbuluar bukurinë natyrore dhe kulturore të Vevçanit. Është një përvojë që i afron njerëzit, nxit kreativitetin dhe lë gjurmë të qëndrueshme – si në art ashtu edhe në zemër. Mos e humb këtë mundësi – apliko dhe bëhu pjesë e kësaj aventure kreative! #BesoNëTëArdhmen./Alsat.mk.
