Statistikat: Maqedonia e Veriut lë pas 14 shtete të BE-së për shtretërit spitalorë

Në vitin 2024, në BE kishte 507 shtretër spitalorë për 100,000 banorë, një rënie e lehtë nga 511 të regjistruar në vitin 2023, tregojnë të dhënat e Eurostat.

Trendi i uljes së shtretërve spitalorë filloi në vitin 2009 (582 shtretër spitalorë për 100,000 banorë), si rezultat i ndikimit të zhvillimeve shkencore dhe teknologjike që shkurtuan kohëzgjatjen mesatare të qëndrimit për shumë procedura spitalore ose i zëvendësuan ato me trajtim ambulator ose ditor.

Midis vendeve të BE-së, Bullgaria ka më shumë shtretër spitalorë për 100,000 banorë – 870, e ndjekur nga Gjermania me 759, Rumania me 731, Austria me 655 dhe Republika Çeke me 639.

Në të kundërt, gjashtë vende të BE-së kanë më pak se 300 shtretër spitalorë për 100,000 banorë: Suedia (187), Holanda (221), Danimarka (226), Finlanda (248), Spanja (283) dhe Irlanda (293).

Për sa i përket shtretërve në institucionet e kujdesit afatgjatë, Holanda (1,390), Suedia (1,298) dhe Belgjika (1,249) kanë më shumë.

Greqia me 20 dhe Bullgaria me 26 shtretër kujdesi afatgjatë për 100,000 banorë janë në fund të listës së vendeve të BE-së.

Të dhënat më të fundit të disponueshme të Eurostat për Maqedoninë e Veriut janë për vitin 2021 dhe tregojnë se vendi kishte 449 shtretër spitalorë për 100,000 banorë dhe 51 për kujdes afatgjatë. Sa i përket numrit të shtretërve spitalorë, Maqedonia e Veriut është përpara 14 shteteve anëtare të BE-së.