Ukraina pranon pas një muaji sulmet ndaj bazave ruse në Krime

Ukraina ka marrë përgjegjësinë për një seri sulmesh ajrore në Krime, pas një muaji pasigurie se kush ishte pas tyre.

Një nga sulmet, i cili ndodhi në fillim të gushtit, kishte në shënjestër bazën ushtarake ruse Saky dhe vrau një person.

Sulmi konfirmon një zgjerim të konsiderueshëm të konfliktit nga Ukraina në Krime, e cila u aneksua nga Rusia në 2014, shkruan BBC.

Në një artikull për agjencinë kombëtare të lajmeve Ukrinform, komandanti i lartë i Kievit, Valeriy Zaluzhnyi, tha se raketat ukrainase kishin shënjestruar një numër vendesh ushtarake të Krimesë, duke përfshirë bazën ajrore Saky e cila u trondit nga shpërthime të shumta më 9 gusht.

Ai pretendoi se sulmi kundër një baze të përdorur nga Moska për të nisur sulmet kundër Ukrainës  nxori jashtë veprimit 10 avionë luftarakë rusë.

Përveç dëmtimit të aftësive ushtarake të Rusisë, Zaluzhnyi tha se synohej të sfidonte besimin e përgjithshëm ushtarak të Rusisë dhe ndjenjën e mosndëshkimit.

Sulmet ishin pjesë e një përgjigjeje të qëllimshme ndaj përpjekjeve ruse për t’i larguar civilët e saj nga konflikti, tha ai.

Baza ajrore Saky është afër Novofedorivka në bregun perëndimor të Krimesë, një zonë plazhi e njohur për turistët rusë.

Është hera e parë që Ukraina ka sulmuar Krimenë që nga fillimi i pushtimit rus në shkallë të gjerë në shkurt.