Lamine Xhamal, me dy rekorde të reja që mund t’i kalojë në “EURO 2024”

Lamine Xhamal vazhdon të thyejë rekorde. Pasi u bë futbollisti më i ri që luajti një ndeshje në Kampionatin Europian, konkretisht kundër Kroacisë, në moshën 16 vjeç e 338 ditë, anësori i Barcelonës theu një tjetër rekord para kohe. Ai u bë lojtari më i ri që ka luajtur në raundet me eliminim direkt të kompeticionit kontinental të kombëtareve, në moshën 16 vjeç e 353 ditë.

Rekordin e mëparshëm të futbollistit më të ri, që kishte regjistruar minuta në fazën me eliminim direkt të Kampionatit Europian e mbante anglezi Jude Bellingham, i cili në edicionin e fundit të turneut mori pjesë në çerekfinale kundër Ukrainës (4-0), kur ishte 18 vjeç e 4 ditë. Në të njëjtin Europian, Pedri dhe Musiala kishin qenë gjithashtu më të hershmit për të luajtur në raundet kualifikuese, por Bellingham i kaloi ata me disa ditë diferencë.

Pas vendosjes së këtyre dy shenjave në “Euro 2024”, Lamine Xhamal ka ende shansin për të qenë lojtari më i ri që shënon në një Europian dhe më i riu që luan në një finale të këtij kompeticioni. Zvicerani Johan Vonlanthen mban rekordin e golashënuesit më të ri me 18 vjeç e 141 ditë, ndërsa portugezi Renato Sanches ishte më i riu në një finale të Europianit me 18 vjeç e 328 ditë.