250 banorë të ishullit italian urdhërohen të evakuohen për shkak të aktivitetit vullkanik

Banorët në ishullin e vogël italian të Vulcano janë urdhëruar të evakuohen gjatë natës për shkak të rritjes së aktivitetit vullkanik dhe niveleve të rrezikshme të dioksidit të karbonit.

Rreth 250 njerëzve u është thënë të largohen nga shtëpitë e tyre të dielën, ndërsa një ndalim një-mujor për mbërritjet e turistëve në ishull ka hyrë gjithashtu në fuqi.

Një përqendrim i lartë i CO2 është regjistruar në gazrat që dalin nga vrimat e vullkanit lokal ditët e fundit.

Muajin e kaluar, disa banorë kishin raportuar vështirësi në frymëmarrje dhe probleme shëndetësore, shkruan Euronews, përcjell Klankosova.tv

Sipas të dhënave të ofruara nga vullkanologët dhe shkencëtarët, prodhimi ditor i CO2 i vullkanit është 480 ton, gati gjashtë herë më shumë se nivelet normale.

Është një gaz i rëndë që zbret në tokë dhe zvogëlon sasinë e oksigjenit, gjë që krijon vështirësi në frymëmarrje që mund të kenë efekte vdekjeprurëse.

Zona e ishullit që konsiderohet më e rrezikuar është një rajon gjashtë kilometra pranë Puerto de Levante.

Pesëmbëdhjetë vullnetarë të Kryqit të Kuq dhe katër vullnetarë të Mbrojtjes Civile janë të pranishëm në ishull së bashku me Karabinierët e Italisë për të menaxhuar situatën.

Komuna po ofron gjithashtu ndihmë për të prekurit që variojnë nga 400 euro deri në 800 euro në muaj.

Ishulli Vulcano, i cili është emëruar pas zotit romak të zjarrit Vulcan, ndodhet në veri të Siçilisë në Detin Tirren.

Sipas Institutit Kombëtar Italian për Gjeofizikën dhe Vullkanologjinë (INGV), vullkani në ishull shpërtheu për herë të fundit mbi 130 vjet më parë.