78 për qind e mjekëve janë ballafaquar me dhunë në vendin e punës, thotë Demiri

Ministri i Shëndetësisë Ilir Demiri, me rastin e 12 marsit – Ditës evropiane për rritjen e vetëdijes kundër dhunës ndaj punonjësve shëndetësor, theksoi se dhuna kundër mjekëve është e palejueshme dhe e dënueshme me ligj. Demiri thotë se punonjësit shëndetësor duhet të ndjehen të sigurt në vendin e tyre të punës, që të mund të ofrojnë kujdes shëndetësor.

“Të dhënat e Odës së Mjekëve flasin se 78 për qind e mjekëve janë ballafaquar me ndonjë lloj dhune në vendin e punës, ndërsa 80 për qind janë ballafaquar me dhunë verbale. Këto janë të dhëna të tmerrshme, që tregojnë se në çfarë shoqërie jetojmë. Në shoqëri nuk duhet të ketë tolerancë për dhunën ndaj mjekëve, pasi kjo paraqet pasiguri edhe për pacientët”, tha Demiri.

Ndryshe, vitin e kaluar janë bërë ndryshime në Kodin Penal, me të cilat dhuna ndaj mjekëve në kryerjen e punëve profesionale, konsiderohet si sulm ndaj personit zyrtar, që është vepër penale dhe parashihet dënim me burg.