“Në të njëjtën kohë, numri i përgjithshëm i personave të lënduar është ulur nga 4.731 në 3.868. Bëhet fjalë për 863 persona të vrarë dhe të lënduar më pak, përkatësisht një ulje prej 18,24%”.
“Këto shifra janë dëshmi e qartë se qasja sistematike në përmirësimin e sigurisë në trafik jep rezultate konkrete. Numri i përgjithshëm i aksidenteve të trafikut është ulur nga 5.485 në 4.840, përkatësisht me 11,76%. Numri i aksidenteve të trafikut me pasoja fatale është ulur nga 82 në 54, ose me 34,15%, ndërsa numri i aksidenteve të trafikut me lëndime të rënda trupore është ulur nga 594 në 528, përkatësisht me 11,11%”, thonë nga MPB.
Numri i aksidenteve të trafikut me lëndime trupore është ulur nga 2.291 në 1.896, ose me 17,24%, ndërsa numri i aksidenteve me dëme materiale është ulur nga 2.518 në 2.362, përkatësisht me 6,20%. Numri i personave me lëndime trupore është ulur nga 3.949 në 3.116, përkatësisht me 21,09% ose 833 persona. Numri i personave me lëndime të rënda trupore është pothuajse në të njëjtin nivel – 686 në vitin 2025 dhe 690 në vitin 2026.
“Rëndësia e këtyre rezultateve është edhe më e madhe nëse merret parasysh se për vite me radhë numri i viktimave në trafik ka mbetur në nivel të lartë. Në periudhën nga viti 2010 deri në vitin 2025, në aksidente trafiku çdo vit kanë humbur jetën nga 116 deri në 198 persona, ndërsa në vitet 2019 dhe 2025 janë regjistruar nga 132 persona të vdekur. Kjo tregon se për një periudhë të gjatë nuk ishte arritur një ulje thelbësore dhe e qëndrueshme e numrit të viktimave”.
“Ndryshimi pozitiv në vitin 2026 është rezultat i një qasjeje të integruar që përfshin sistemin “Safe City”, ndryshimet ligjore, kontrollet e shtuara policore dhe aktivitetet e vazhdueshme parandaluese”.
“Me fillimin e shqiptimit të sanksioneve përmes sistemit “Safe City” më 1 shkurt 2026, u vendos një model i ri veprimi. Shkeljet detektohen automatikisht, lëndët përpunohen në mënyrë elektronike, ndërsa njoftimet dërgohen përmes SMS-së dhe postës elektronike. Nuk bëhet fjalë vetëm për futjen e një teknologjie të re, por për një ndryshim në mënyrën e zbatimit të rregullave të trafikut, përkatësisht nga kontrollet e herëpashershme drejt një veprimi të vazhdueshëm, të parashikueshëm dhe të paanshëm. Me këtë rritet siguria se shkelja e detektuar do të procedohet, zvogëlohet hapësira për veprime subjektive dhe ndikohet në mënyrë parandaluese në sjelljen e pjesëmarrësve në trafik”, thonë nga MPB.
Rezultatet në tetë muajt e parë tregojnë se kjo qasje po krijon ndryshime reale në rrugë. Ministria e Punëve të Brendshme do të vazhdojë me përmirësimin dhe zgjerimin e sistemit “Safe City”, me kontrolle të shtuara dhe me masa të orientuara drejt uljes së aksidenteve në trafik, përkatësisht më pak të lënduar dhe më pak jetë të humbura.
