A mund të zbardhen vërtet flokët nga stresi? Ja çfarë thotë shkenca

Në studimet e mëparshme, studiuesit u kërkuan pjesëmarrësve të plotësonin pyetësorë në lidhje me ngjyrën e flokëve dhe nivelet e stresit dhe u përpoqën t’i lidhnin ato. Për shembull, në një studim të botuar në vitin 2016, shkencëtarët anketuan më shumë se 1,100 të rinj turq dhe zbuluan se 315 nga ata që raportuan thinja të parakohshme të flokëve kishin nivele më të larta stresi sesa ata që nuk e kishin.

Por një studim mbi minjtë i botuar në vitin 2020 e çoi hulumtimin një hap më tej. Në të, studiuesit shkaktuan stres te minjtë në mënyra të ndryshme, duke përfshirë edhe duke injektuar atyre një kimikat të ngjashëm me specat djegës që shkaktoi një përgjigje “lufto ose ik”. Kjo shkaktoi çlirimin e hormonit të stresit, norepinefrinës, i cili i zbrazi folikulat e flokëve nga qelizat staminale të përfshira në shtimin e pigmentit në leshin e miut. Pastaj flokët u bënë të bardha.

“Studiuesit kanë treguar efekte të ngjashme të niveleve të larta të norepinefrinës në qelizat staminale njerëzore në laborator, duke mbështetur idenë se hormoni i stresit është i lidhur me zbardhjen e flokëve tek njerëzit”, tha Ya-Chieh Hsu, një profesoreshë e Harvardit dhe një nga autorët e studimit.

Por studimet mbi këtë temë janë të vështira për t’u kryer te njerëzit sepse studiuesit nuk mund të shkaktojnë në mënyrë etike përgjigje artificialisht të larta ndaj stresit te njerëzit, siç mund të bëjnë te kafshët, shtoi Dr. Hsu.

Megjithatë, një studim i vogël i botuar në vitin 2021 e përparon më tej rrëfimin: Studiuesit shkulën fije të ndryshme flokësh nga 14 vullnetarë që kishin të paktën disa fije thinjash. Disa flokë ishin plotësisht gri, disa ishin pjesërisht gri dhe disa nuk ishin aspak gri. Shkencëtarët më pas krijuan imazhe dixhitale me rezolucion të lartë të qimeve dhe llogaritën se kur secila qime zbardhej, duke përdorur vlerësime të shkallës së rritjes së flokëve.

Ata gjithashtu u kërkuan pjesëmarrësve të regjistronin përvojat stresuese nga viti i kaluar në një vijë kohore dhe t’i rendisnin ato nga përvoja më pak stresuese tek ajo më stresuese. Studiuesit zbuluan se momenti kur një fije floku zbardhej shpesh korrespondonte me momentin më stresues të vullnetarit gjatë vitit të kaluar.

“Kjo ishte hera e parë që një studim kishte lidhur ngjarje specifike stresuese me momentin e saktë kur flokët filluan të thinjeshin”, tha Martin Picard, një profesor i asociuar i mjekësisë së sjelljes në Universitetin e Kolumbias dhe autori kryesor i studimit.