Bankat globale raportuan 2 trilionë dollarë transaksione të dyshimta

Bankat globale, për gati dy dekada, kanë transferuar mbi dy trilionë dollarë pagesa, që ato besonin se ishin të dyshimta, thuhet në një raport të publikuar nga Konsorciumi Ndërkombëtar i Gazetarëve Hulumtues. Raporti bazohet në mijëra dokumente që kanë rrjedhur në publik nga krahu i Departamentit amerikan të Thesarit, që heton pastrimin e parave. Dokumentet tregojnë se si bankat kryesore perëndimore i kanë ndihmuar rrjetet kriminale në të gjithë botën, përfshirë ato në ish-Bashkimin Sovjetik, të lëviznin dhe të fshihnin para. Mbi 2.100 dokumentet e Rrjetit të Krimeve Financiare janë publikuar fillimisht nga Buzzfeed dhe më pas janë shpërndarë te mbi 400 gazetarë në gjithë botën, për hulumtime të mëtejshme. Dokumentet e Rrjetit të Krimeve Financiare përbëhen nga Raporte të Aktivitetit të Dyshuar, të cilat datojnë nga viti 1999 deri më 2017.