Bateritë me kripë deti një zëvendësim i mundshëm i dobishëm për litiumin
Bateritë me kripë deti, sipas njohurive shkencore, kanë katër herë kapacitetin e litiumit, raportoi Euronews
Studiuesit kanë zhvilluar tashmë një bateri të bërë nga squfur natriumi. Është një përbërje kimike e marrë nga uji i detit. Një bateri e tillë nuk është vetëm më e lirë, por edhe më miqësore me mjedisin sesa bateritë ekzistuese litium-jon. Studiuesi përgjegjës Shenlon Chao nga Universiteti Australian i Sidneit beson se kjo bateri mund të jetë një pikë kthese në energjinë e rinovueshme. Megjithatë, sipas tij, ka edhe disa pengesa financiare për zhvillimin e baterive me kripë deti.
Nisur nga kushtet klimatike dhe mjedisore, nevoja për të kaluar në burime të rinovueshme të energjisë, si era dhe Dielli, po rritet në planet. Megjithatë, duke qenë se burimet e rinovueshme nuk janë aq të qëndrueshme, ekziston gjithashtu nevoja për ruajtjen e energjisë, për të cilën përdoren bateritë.
Shumë bateri të disponueshme aktualisht janë bërë nga materiale të rralla, si litium, qymyr dhe kobalt. Në mënyrë që Bashkimi Evropian të arrijë neutralitetin klimatik, do t’i duhet të konsumojë 18 herë më shumë litium deri në vitin 2030 dhe pothuajse 60 herë më shumë deri në vitin 2050.
Presidentja e Komisionit Evropian, Ursula von der Leyen, njoftoi në shtator të këtij viti se metalet e rralla së shpejti do të jenë po aq të rëndësishme sa nafta dhe gazi. Sidoqoftë, ato gjithashtu kanë një çmim. Minierat e litiumit mund të rezultojnë në mungesë uji, shkatërrim të biodiversitetit dhe ndotje të tokës. Përveç kësaj, marrja dhe përpunimi janë shumë të shtrenjta. Duke pasur parasysh se kripa e detit është e pranishme kudo, një bateri me kripë deti mund të jetë një alternativë shumë më ekonomike për bateritë litium-jon.
Nuk janë risi “nga dje”, thonë shkencëtarët. Si koncept, ai ekziston për 50 vjet, por nuk u konsiderua mjaft i dobishëm për shkak të periudhës së shkurtër të përdorshmërisë. Megjithatë, bateritë e kripës së detit që po zhvillohen tani janë të ndryshme nga paraardhësit e tyre.
Shkencëtarët modifikuan elektrodat për të përmirësuar reaktivitetin e squfurit, një element kyç për kapacitetin e ruajtjes së energjisë. Rezultati është një bateri me “kapacitet super të lartë dhe jetë jashtëzakonisht të gjatë në temperaturën e dhomës”, shpjegojnë studiuesit nga Universiteti i Sidneit.
