Bujqit e lagjes Dardania, në protesta

Gazetar: Bashkim Sulejmani

Dhjetëra bujq të Tetovës, kanë dalë sot në pjesën e poshtme të Lagjes Dardania, për të shprehur revoltën e tyre kundër institucioneve qendrore dhe lokale, për mos marrjen masa ndaj prishjes së kanalit të vetëm përmes të cilit bujqit ujisin mbi 200 hektar tokë. Gjendja e tyre vazhdon prej një viti. Ata para mediave nxorën madje edhe fletëpagesat e shumë investimeve që kanë bërë për mbjellje të tokave, të cilat tani duhet të lihen të shkreta sepse asnjë institucion nuk merr masa për kthimin në gjendjen e mëparshme të kanalit për ujitje të tokës.

“Ja faturimi i pagesës së farës së patateve, më se tre ton janë të paguara nga 135 den vetëm fara e patates, por të ujitura nuk kanë qenë vetëm shkaku i këtyre qasjeve për ndërtimi të kreut të komunës fillimisht. Të njëjtin hall e kemi pas edhe vitet e shkuara por jemi gjendur me gurë e gjëra që të nxjerrim ujë. Këtë problem dikush duhet ta zgjidh. Këto duhet ta zgjidhin, sepse nëse nuk zgjidhet, unë për veten time, dhe familja ime duhet të na thonë të mos mbjellim në pranverë, sepse kam bë investime më shumë se 70.000 denarë”, tha një bujk.

“Te komuna kemi qenë tek Ministria e Bujqësisë kemi qenë, ata e hedhin topin herë andej e herë këndej, premtojnë shumë asgjë s’bëjnë. Nga 2017 vetë jemi mundu por me këtë gjendje as një pëllëmbë s`mund të ujitim. Bisedohet për mbi 200 hektar tokë, që mbesin të vdekura”, shtoi një bujk tjetër.

“Ujin e kemi pengesë tani, bëjnë biznese tjera ndërsa ne bizneset e vogla s’merren parasysh. Kush është më i forti fiton. Vetëm ne si familje kemi 230 dekar me misër patate jonxhë, si familje. Më duket se në pranverë nëse nuk merret parasysh protesta do marrim kuferin”, theksoi një bujk.

Kërkuam sqarim edhe nga Ministria e Bujqësisë, nga ku fajin e hodhën tek përbërja e kaluar e drejtorisë për ekonomizimin me ujërat. Ky institucion paralajmëroi zgjidhje në vitin e ardhshëm.

“Drejtoria për ekonominë e ujërave ka pasur probleme dhe vështirësi në kuadër të funksionimit të saj si drejtori andaj dhe ne si Ministri kemi nda mjete bashkë me ministrin që ta ndihmojmë sepse është me rëndësi për mirëmbajtjen e kanaleve të ujitjeve. Tani ka paga dhe ka filluar punët me disa punëtorë që vitin që vjen të dalin në terren dhe si drejtori të funksionojë si duhet, sepse gjithë kanalet e ujitjes varen nga mirëmbajtja e tyre andaj nëse bujqit nuk kanë ujë s’mund ta zhvillojnë veprimtarinë e tyre”, u shpreh Flakron Bexheti, zv ministër i bujqësisë.
Protesta e bujqve pas shkëputjes së kanalit për ujitje të mbi 200 hektar tokë do të vazhdojë edhe ditët në vazhdim, me qëllim që të gjendet një zgjidhje për lënien pa ujë të të mbjellave nën lagjen Dardania./Alsat.mk