Çfarë ndodh në trurin e adoleshentëve kur prindërit i kritikojnë?

Një grup neuroshkencëtarësh nga Universiteti i Pittsburgh, Kalifornia-Berkeley dhe Harvard vendosën të hetojnë se si kritika prindërore ndikon te adoleshentët, veçanërisht në trurin e tyre. Në një studim që përfshinte 32 djem adoleshentë dhe 22 vajza adoleshente, shkencëtarët bënë një zbulim të mahnitshëm.

Studiuesit u fokusuan në tre zona specifike në trurin e adoleshentëve – zona të lidhura me përpunimin e emocioneve negative, zonat e përfshira në rregullimin e emocioneve dhe të ashtuquajturat zona nervore të përfshira në të kuptuarit e këndvështrimeve të njerëzve të tjerë.

Ata shikuan se sa aktivitet ka ndodhur në këto zona kur adoleshentët dëgjuan prindërit e tyre, veçanërisht nënat e tyre, që i kritikonin, krahasuar me kur dëgjonin nënat e tyre duke folur për gjëra “të parëndësishme” si blerjet ushqimore. Ata vunë re gjithashtu nëse kishte ndonjë ndryshim në aktivitetin e trurit pas bisedës me prindërit.

Rezultatet treguan se kur një adoleshent dëgjon kritika nga prindërit e tij, truri i tij fjalë për fjalë mbyllet për disa momente. Gjegjësisht, gjatë dëgjimit të kritikave, truri i adoleshentëve shfaqi aktivitet më të madh në zonat e përfshira në emocione negative, por gjithashtu reduktoi ndjeshëm aktivitetin në rajonet e përfshira në të menduarit, kontrollin emocional dhe marrjen e perspektivës.