Një nga aplikacionet më të famshme për personalizimin e telefonave Android – Nova Launcher – po i jep fund zyrtarisht zhvillimit, konfirmoi krijuesi i tij Kevin Berry.
Barry, i cili e kishte zhvilluar aplikacionin në mënyrë të pavarur për vite me radhë, u largua nga kompania Branch, e cila mori përsipër projektin në vitin 2022. Siç deklaroi ai, kishte planifikuar ta bënte Nova Launcher me burim të hapur, por iu tha të ndalonte së punuari në të.
“Kalova muaj të tërë duke pastruar dhe përgatitur kodin, por u mor vendimi për të ndaluar punën në projekt”, tha Berry.
Ndërkohë që aplikacioni do të vazhdojë të funksionojë në telefonat ku është instaluar tashmë, nuk do të ketë më përditësime ose mbështetje. Kjo do të thotë që me kalimin e kohës, ndërsa sistemi operativ Android ndryshon, Nova Launcher do ta ketë gjithnjë e më të vështirë të përballet me veçoritë e reja.
Lajmi ka shkaktuar një reagim të madh në komunitetin e Android. Në forume dhe media sociale, përdoruesit po shprehin keqardhjen e tyre dhe po theksojnë se Nova Launcher ishte një “mjet legjendar” që kontribuoi ndjeshëm në popullaritetin e Android.
Si kujtesë, Nova Launcher ishte ndër aplikacionet më të njohura të personalizimit të ekranit kryesor, duke u lejuar përdoruesve të ndryshonin ikonat, paraqitjet, gjestet dhe shumë detaje të tjera që i shndërronin telefonat standardë Android në pajisje plotësisht të personalizuara.
