Gjykata bllokon urdhrin e Bidenit për vaksinim
Një panel federal apeli në Luiziana ka bllokuar përkohësisht rregulloret e reja të sigurisë të administratës Biden në SHBA që i obligon bizneset me më shumë se 100 punëtorë që të kërkojnë që punonjësit e tyre të vaksinohen kundër COVID-19 deri në fillim të janarit.
Kolegji prej tre gjyqtarësh nga Gjykata e Apelit i dha qëndrim të përkohshëm një grupi biznesesh, grupesh fetare, organizatash avokuese dhe disa shteteve të udhëhequra nga republikanët që kishin paraqitur një peticion të përbashkët në gjykatë, duke argumentuar se administrata kishte tejkaluar autoritetin e saj.
Shumë shtete të udhëhequra nga republikanët kanë paraqitur sfida ligjore kundër rregullit të ri, mes tyre Teksasi, Misisipi, Karolina e Jugut dhe Utah.
Gjykata tha në një urdhër të shkurtër se gjyqtarët po bllokonin rregulloren “sepse peticionet japin arsye për të besuar se ka çështje të rënda statutore dhe kushtetuese me rregulloren”. Gjykata shtoi se rregulli ishte pezulluar “në pritje të veprimeve të mëtejshme nga kjo gjykatë”.
Urdhri prej dy faqesh nuk shtjellonte se cilat ishin problemet kushtetuese dhe statutore me rregullin ose nuk jepte ndonjë tregues nëse gjyqtarët ishin dakord me kundërshtarët e rregullit. Por udhëzoi administratën Biden të përgjigjet deri në orën 17:00.
Rregulloret nuk janë planifikuar të hyjnë në fuqi deri më 4 janar. Të enjten, administrata Biden e caktoi atë datë si afatin përfundimtar për kompanitë e mëdha për të administruar vaksinat kundër koronavirusit ose për të filluar testimin javor të punëtorëve të tyre. Vendimi ishte përpjekja më e madhe e qeverisë për të angazhuar bizneset private në luftimin e virusit.
Rregullat e reja u hartuan nga Administrata e Sigurisë dhe Shëndetit në Punë dhe u lëshuan si një “standard i përkohshëm emergjent”, duke thirrur fuqitë emergjente në lidhje me sigurinë në vendin e punës. Duke filluar për kompanitë me 100 ose më shumë punëtorë, rregullorja pritet të mbulojë 84 milionë punëtorë, afërsisht 31 milionë prej të cilëve janë të pavaksinuar. Ai paraqet detaje të një plani që presidenti Biden njoftoi për herë të parë në shtator.
